50 o bethau sy'n fy nghythryddu

Iawn, dw i wedi dwyn y syniad yma'n llwyr off edefyn ar y Maes, ond gan fy mod i wedi gwneud 32 yna'n barod dw i'n teimlo'r casineb yn llenwi fyny ynof, ac os na ddyweda i mwy mi wna'i ffrwydro.

(1) Dyncio bisgedi mewn te
(2) Pobl sydd ddim yn indicetio
(3) Motobeics yn dy oddiweddyd
(4) Hysbyseb DFS [cytuno efo Fampir]
(5) Carafanau ar y lon
(6) Pan dachi'n sdyc tu ol i car araf uffernol ond methu ei phasio achos mae pawb tu ol ichdi'n dy oddiweddyd
(7) Hen bobl sy'n cwyno pa mor ddrwg ydi'r byd rwan
(8) Girly-girls
(9) Cathod sy'n eistedd ac yn sbio arnat yn smyg
(10) Acen Crymych

(11) Pobl sy'n yfed te gwan
(12) Pobl sy'n dweud 'dw i ffansi cyri' a chael Korma, be 'di point?
(13) Genod sy'n mynnu dydyn nhw'm isho bwyd achos gathon nhw 'darn o dost bora 'ma'
(14) Pete a Nikki
(15) Plant efo tadau cyfoethog sy'm angen gweithio byth
(16) Pobl sy'n enwog am ddim byd e.e. Paris Hilton, Tara Palmer-Tompkinson, Callum Best
(17) Pobl sy'n teimlo'n sal pan ti'n egluro mai cig yw cnawd fu unwaith yn brefu'n braf fore gynt, neu cnawd celain
(18) The X-Factor, Pop Idol, Wawffactor a phob ryw sioe felly
(19) Unrhywun sy'n cymryd mwy na hanner awr i 'wneud eu hunain yn barod' pan ti dim ond yn mynd i'r pyb/siop leol/Tescos

(20) Bowsar oren Clwb Ifor
(21) Ffrindiau ysgol doeddet ti'm actiwli yn ffrindia efo, ond ers ti'n mynd i coleg mae nhw wrth eu boddau efo chdi
(22) Unrhyw un sy'n meddwl bod 'yfed botal o win cyn mynd allan' yn 'nyts'
(23) Pobl sy'n meddwl eu bod nhw'n 'nyts'/'crazy'
(24) Chocaholics. Barus ydynt, nid caeth.
(25) Saeson sy'n meddwl fod Cymru a'r Cymry a'r Gymraeg yn 'quaint' [gwaeth ydyw hyn na dirmyg neu casineb]
(26) Pobol sy'n goddiweddyd drwy fynd 50mya ar y ffordd ddeuol
(27) Pobl sy'n mynd y medrant weld yn iawn heb sbecdols pan nas fedrant o gwbl
(28) y Seiad Cerddoriaeth
(29) Rheiny sy'n mynd dramor heb boddran dysgu 'diolch' yn yr iaith frodool a sy mond yn bwyta bwyd Prydeinig yno

(30) Anlwc tragwyddol timau chwaraeon Cymru
(31) Pianos efo un nodyn allan o diwn
(32) Ffasiwn, a phobl sy'n mynnu cadw fyny efo bob dim
(33) Hen berthnasau sy'n dweud wrtha ti dy fod wedi newid, er nad wyt ti wedi
(34) Pobl sy'n dalach na fi
(35) Rheiny a ofnant unrhyw fath o wrthdaro. Cachwrs.
(36) Pan fo rhywun yn anghywir, ti'n gwybod eu bod nhw'n anghywir, ond mae nhw dal yn argyhoeddedig eu bod nhw'n gywir
(37) Y pobl 'na sy'n mynd yn flin neu'n ypset pan ti'n lladd pry
(38) Y ffaith bod miliynau o bobl yn gwylio sebonau opera
(39) Jonsi

(40) Agwedd nifer o bobl os nad wyt ti ddim yn licio cerddoriaeth 'ymylol' ti ddim yn cŵl. Ffyc off.
(41) Mamau sy'n rhedeg o amgylch y bwrdd bwyd fel twrci a cae eistedd lawr a mwynhau'r bwyd eu hunain
(42) Pobl ti'm yn abod yn iawn, ond pan ti'n eu gweld nhw mae nhw'n gofyn yr un hen gwestiynau i ti, er eu bod nhw'n gwybod yn iawn beth fydd dy ateb
(43) Neis-neisrwydd
(44) Genod sy'n gofyn i ti sut maen nhw'n edrych, ac yn gwylltio pan ti'n dweud y gwir
(45) Cardigans
(46) Y ganran fechan o fyfyrwyr ffroenuchel a snobyddlyd 'well-na-chi' prifysgol Aberystwyth
(47) Celwyddgwn sy'n honni bod pobl efo sbecdols yn medru edrych yn 'cŵl'
(48) WHAT EVER!
(49) Hogia'n gwisgo pinc

(50) Y gân Iwcs newydd 'na sydd wastad ar Champion FM a sydd, heb os na oni bai, y gân mwyaf ofnadwy yn hanes y bydysawd, a'r ffaith bod Champion FM neu unrhyw orsaf arall yn fodlon chwarae'r math erchylltra annuwiol

Bwrw

Mai'n bwrw glaw yn sobor iawn, felly dw i wedi bod yn edrych ar blogs pawb arall ac ati. Mi eshi draw i weld Chwadan a mi es i'r wefan Wikicharts o fanno, sy'n dangos pa dudalennau yw'r mwyaf poblogaidd. Ymysg y pump ar hugain mwyaf poblogaidd oedd:

5. List of Big-bust models and performers
7. List of female porn stars
8. Sexual intercourse
9. List of sex positions
10. Masturbation
11. List of gay porn stars
12. Nude celebrities on the internet
13. Pornography
19. Homosexuality
24. G-string
25. Anal sex

Felly mae bron i hanner o chwiliadau 'Top 25' Wikipedia yn rhai budron. Mi ges i eitha gwên wrth ddarllen rhai ohonyn nhw, fel List of Fictional Diseases (17), Norway (18), Dragon Ball Z (32), List of famous left-handed people (53), Greece national basketball team (86) a Pat Boone yn rhif 98. Cofiwch, mae gan Wiki Saesneg dros filiwn o dudalennau, sy'n gwneud rhai o'r dewisiadau uchod yn rhai da iawn. Ond mae'r diddordeb mawr mewn rhywbethau yn gwneud imi gofio dyfyniad o Blackadder, cofio...

DR JOHNSON: Sir, I hope you're not using the very first English dictionary to look up rude words!
BLACKADDER: Why not? That's what all the others will be used for...

Mae'n iawn, chi.

Peth arall diddorol oedd y wefan yma, sy'n hawlio cofnodi 1 - 10 mewn dros 5000 o ieithoedd. Iawn, medda fi, ond mae rhai jyst yn wirion. Er enghraifft, yn ôl y wefan mae'r Cardis yn cyfri i ddeg megis:
în, tô, târ, câr, cŵi, sich, soch, nîch, noch, dê.

Oni fedar rhywun gadarnhau imi nad hwn mo'r achos? PLIS!

Mad Max

Henffych! I dŷ Nain dw i'n mynd heddiw. Mi ffoniodd neithiwr a dweud y byddai'n gwneud ffish mewn sôs imi i ginio. Ddim yn siwr faint yn union dw i'n edrych 'mlaen i hyn, ond dyna ni. Nid ydi Nain yn gogydd ar y naw. A dweud y gwir dim ond Yorkshire Pudding mae hi'n gallu gwneud yn gall; mae hyn oed ei grefi hi'n medru blasu fel glo. Eniwe.

Fe awn a'r ci am dro medda' hi. Iawn, medda' fi. Mae Nain yn gwarchod ci ei chwaer a'm hen fodryb, Nel, am ychydig o ddyddiau. Bastad ydyw o'r enw Max, neu fel y mae gweddill y teulu yn ei gyfeirio ato, Mad Max. Does golwg o ddofi arno; mwncwn wyllt o gi sy'n cyfarth ac yn tynnu ac yn gwneud lol am ddim byd, ac, yn ôl Nel, 'Dydi o methu dallt Cymraeg, 'mond Susnag'. Sy'n egluro rhywbeth, o leiaf (mae hyn yn wirach fyth os yr ystyrrir nad yw Nel yn un o ddefnyddwyr ceinaf yr iaith fain, os yn wir y gellir ddefnyddio'r math iaith yn gain).

Felly dyna fy niwrnod i. Mae Mam yn dweud fod yn rhaid imi ddysgu sut mae clymu tei. Gwir ydyw'r geiriau, canys nad wyf gyda'r syniad cyntaf sut mae gwneud, a dydi hynny fawr o help o ystyried mewn mis fydda i'n gorfod gwneud pedwar diwrnod yr wythnos (a dw i'm yn meddwl fydd unai Haydn neu Ellen yn hapus iawn os dw i'n eu deffro nhw i wneud imi). A mae hi isho dysgu mi sut i smwddio. Yn hyn o beth, nid yw fy nghyfnod yn y Brifysgol wedi bod cystal a chyfnod Glyn yn nhŷ Big Brother. Unwaith y smwddiais, unwaith rhois y ffidil yn y to. Sawlgwaith llarpiog fu 'nillad.

Bydd rhaid imi fynd mewn 'chydig. Da bydded.

Y Disgwyl

Nid yw amynedd ymysg fy rhinweddau. Mae'r tueddiad i bryderu, fodd bynnag, yn bendant yn nodwedd gennyf. Ac ar y funud, gyfeillion, mae'r cyfuniad yn un eithaf gwenwynig. Gadewch imi ymhelaethu, os caf.

Dw i wedi bod yn dweud wrthoch chi am fisoedd (os fuoch chi'n gwrando) fy mod am fynd i wneud hyfforddiant fel athro. Mae wythnos i fynd tan fy mod yn dychwelyd i Gaerdydd a dechrau'r cwrs, a dw i bron a ffrwydro eisiau ei dechrau, er fod fy lefelau petruswch yn codi'n gynyddol ac yn gynt. Er bod deufis-ish tan ei bod yn digwydd, dw i ddim yn edrych ymlaen at sefyll flaen dosbarth am y tro cyntaf. Dw i ddim yn amau fod hyn yn gyffredin ymysg athrawon-i-fod, er dydi hynny fawr o gysur ar y funud.

Mae digon o bethau i'w ystyried: a fydden nhw'n gwrando? a fyddent yn cambihafio? beth os mae 'na gwffio yn y dosbarth? beth os dw i'n gorfod rhoi ffrae i rhywun talach na fi (sy'n eitha tebygol o ddigwydd)? Nid yw'r hyn gwestiynau yn f'esmwytho yn y lleiaf.

Be' dw i'n ei arswydo fwyaf ydi'r wythnos i'w gwneud mewn ysgol gynradd yn gyntaf. Efo plant go iawn, nid rhai yn eu harddegau sydd efo gronyn o ddealltwrieth o'r byd a'i manion bethau. Mae plant bach yn fy ngwneud i'n sal, a dw i byth yn blino dweud hynny.

Fodd bynnag, ymhen pythefnos fydda i mewn darlithoedd drachefn, ac wedyn yn ceisio dysgu. Ffac, dw i'n pryderu.

Vindaloo

Dw i yn dwat. Twat llwyr, a dweud y gwir. Roeddwn i wedi cael diwrnod arferol o aflwyddiannus o ran pysgota, ac wedi gorfod dioddef gweld fy arch-elyn, Dyfed, yn dal mecryll tra na chefais i ddarn o wymon i gwneud bara lawr efo hyd yn oed. A chyrraeddish i'm adra tan tua hanner awr wedi naw ac fe'r o'n i'n llwgu, ac mi benderfynish gael Indian.

Dw i ddim erioed wedi bod yn ffan o fwyd Indaidd. Dim ond tua dechrau fy nhrydedd flwyddyn yn y brifysgol y bu imi cael blys go iawn am gyri poeth. A fe fuon ni'n arfer mynd i Clwb Cyri Weatherspoons bob wythnos (dim y cyri gorau, na, ond rhad ydoedd), ond unwaith fe fu imi gael y vindaloo yno, ac fe'i hoffais yn fawr, er fy mod yn chwysu wrth ei fwyta.

Felly lawr i Sitar Indian ar Stryd Pesda es i a phenderfynu bydda vindaloo yn braf. Fel mwnci, nis ystyriais y byddai gwahaniaeth aruthrol rhwng vindaloo yr Ernest Willows ac un lle cyri go iawn. Felly mi gyrhaeddais adra ac eistedd lawr a dechrau bwyta.

Dyna pryd aeth pethau'n anghywir; yn gyntaf bu imi ei fwyta'n sydyn iawn, a bu bron imi chwydu pan ddaru'r poethder fy nharo. Ac mi darodd. Ystryffaglais, dim ond yn llwyddo buta chwarter y bastad peth, ac wedi yfed botel fach o Cola cyn llwyddo hynna. I'r bin yr aeth; a minnau'n sal, fy ngyms yn brifo, fy mhen yn curo o'r oherwydd.

Wrth gwrs fe wnaed y trip i'r toiled, ond roeddwn i wedi gorfod cael Immodium yn ystod y diwrnod felly teimlo'n sal a llawn fu fy hanes. Gwely. Match of the Day. Llwgu a sal. Casau vindaloo.

UFOs yn Rachub

Ia wir, ac nid son am Sheila ac Eric dw i.

Fel hyn y bu hi; roedd hanner Rachub heb drydan am thua pedair awr a hanner neithiwr. Roedd rhywun wedi taro mewn i un o'r polion letric a llwyddo gadael rhan isaf Rachub heb olau. Sbwci ydoedd yn wir. Fe es i a 'Nhad am dro rownd Rachub, dim ond er mwyn gweld lle oedd efo golau ac ati.

Braf ydyw blacowt. Mae pawb yn mynd ar y strydoedd ac yn cwyno am ba mor felltigedig ydyw pethau. Ond wedi mynd o Llan dyma fi'n edrych fyny i'r awyr a gweled rhywbeth gwyn od yn sgleinio, ac yn symud yn sydyn iawn. Nid hofrennydd nac awyren mohoni - doedd 'na'm tail-lights arni, ac nid oedd yn symud fel un, ychwaith. Roedd hi tua hanner ffordd drwy'r awyr, ac yn mynd am y dwyrain ac yn symud braidd yn grynedig ac igam-ogam. Fe fuon ni'n ei gwylio am tua dwy funud (yn lythrennol) cyn iddi ddiflannu.

Dyewdodd Dad mai lloeren ydoedd, ond welish i'r un lloeren yn symud cyn gyflymed neu mor rhyfedd. Erratic movements oedd chwedl Dad wrth ceisio egluro i Mam. Goin' zig-zag udish i. Ond mae hi'n 'chydig o ddirgelwch.

Nid hwn mo'r tro cynta' i Ddyffryn Ogwen gael ei styrbio gan bodau o eraill blanedau, wrth gwrs. Dw i'n cofio, ychydig o flynyddoedd nol a minnau ddim eto wedi mynd i'r brifysgol fe fu cynnwrf mawr yn Nyffryn Ogwen oll pan welwyd goleuadau mawrion yn erbyn yr awyr a'r cymylau am filltiroedd. Ac yn wir ichwi fe fu cynnwrf. Es o gwmpas ar fy meic - roedd pawb yn Tyddyn Canol allan yn edrych, ac Ike Moore (alci sydd erbyn hyn yn gelain) yn tynnu lluniau efo'i gamera. Lawr i Goetmor yr es wedyn a roedd pobl yn y stryd yn edrych, ac un dyn efo'i gamcordyr.

A'r diwrnod wedyn bu i bawb glywed mai goleuadau o glwb nos Amser ydoedd, a theimlem oll yn sili, braidd.

Gwich Gwich Gwrach y Rhibyn

A minnau'n un ar hugain mlwydd oed mae rhai pethau dal i fy nychryn a'm anesmwytho. Cefais f'atgoffa o hyn neithiwr, fel mae'n digwydd. Dyma fi yno'n gorwedd yn fy ngwely (ceg yn brifo o hyd) a mae 'na rw sŵn WIAAAAAAAAAAAAAAAAAAAAAAAWIAAAAAAAAAW yn dod o'r ardd. A mi ddychrynais tan cofio beth oedd. Cathod, wrth gwrs, yn ganol nos. Mae'n wirioneddol gas gennai y ffordd mae'n nhw'n seinio wedi'r machlud, mae'n mynd drwyddai ac yn gwneud imi deimlo'n aflonydd iawn. Iych.

Peth arall sydd wedi rhoi cryn braw imi'n ddiweddar ydi ryw grëyr enfawr yn fflio o amgylch y tŷ 'ma ynghanol y dydd. Dw i'n cael cipolwg sydyn o'r peth a fyntau'n hedfan yn powld ac yn meddwl be ffwc cyn imi gofio a brysio i'r ffenast i'w weld. Ond hen adar argoelus ydynt, efo'u gyddfau hir a'u llwydni, yn edrych fel Gwrach y Rhibyn, dw i bob amser wedi dychmygu, er nad erioed gwelais Wrach y Rhibyn (sydd, mae'n siwr, yn trigo wrth ribyn, ond nid ydw i, na Chysgeir, yn gwybod beth ydyw rhibyn, ac byth, mi gredaf, wedi ymweld â un).

Coeliwch ynteu ddim ond fydda i bob amser wedi meddwl bod sain cathod fin nos yn debyg i sut y byddai Gwrach y Rhibyn yn swnio. Dw i'm yn cofio'n iawn pryd fu imi glywed am Wrach y Rhibyn gyntaf, ond darllen amdani a wnes a phob amser meddwl y byddwn i, a finnau ben fy hun, yn cael ei gweled. Na, wir-yr rwan; a medrai weld sut beth ydi hi, hefyd. Mi dynna i lun ichi.

Ym, dw i'n gwybod bod hwnnw'n lun gwael (os nad crap) ond fel hyn y mae Gwrach y Rhibyn yn edrych yn fy marn i. Dw i'n mynd i lechu ffwrdd rwan.

Llond Ceg

Dw i'n siarad fel twat ar y funud achos mae un ochr fy ngheg wedi llwyr ymgolli ei theimlad. Dw i'n amau y bydd hyn yn para'n hir - yn anffodus fe fu'n rhaid i mi gael ddau dosage o y stwff 'na sy'n neud ichdi golli teimlad achos doedd un ddim yn ddigon a bu imi weiddi. Mae hyn yn golygu

1. Dw i'n amlwg efo gwrthsefyll mawr tuag at gyffuriau
2. Fydda i'm yn cael buta tan y p'nawn

Fysa well gin i futa. Dw i'n llwgu.

Nerfau

Mae rhai pethau yn fy nychryn. Dw i ddim, rhaid imi gyfaddef, yn ffan o'r deintydd na'r siop trin gwallt (sy'n golygu fyd gennai wallt hir a dannedd drwg), ond yfory dw i yn mynd am fy ffiling. Do, mi benderfynais mynd drwodd efo'r peth.

Gwneith hi ddim lles imi, chwaith, a finnau'n iawn fel ydw i. Dw i byth wedi ddallt y pwynt i ffilings. Mae bob un dw i wedi ei chael wedi syrthio allan ac yn cael eu traflyncu gennyf.

Ond mae gen i ofn. Mae meddwl am cael nodwydd yn fy ngheg yn gwneud imi deimlo'n sal iawn iawn. Am 9 y bora, eniwe.

Mi eshi weld y physio yn 'Sbyty Gwynedd ddoe ar gyfer dy mhen glin a mi roddodd hithau ymarferiadau imi wneud ond dw i ddim am achos rebal bach dw i.

Extreme Tracker

Oes 'na rywun arall yn hollol obsesd gyda'r dyfais fach yma?

Pob tro fydda i yn ymwelyd a fy mlog fy hun neu un rhywun arall dw i'n mynd yn syth am y teclyn yma. Un rhan yn benodol sydd o ddiddordeb imi, sef, fel dw i wedi dweud o'r blaen yma, y darn lle ma'n dangos beth y mae rhywun yn teipio mewn i beiriant ymchwil er mwyn dod at wefan.

Mae rhai o'r pethau mae pobl yn teipio i mewn yn ddigon od fel ac y maen nhw i ddod yma, yn ddiweddar yn cynnwys pethau megis "dw i'n mwynhau yfed", "Gwynfor ab Ifor" (dw i BYTH wedi son am Gwynfor ab Ifor ar yr hwn flog), "fy ngwlad a'm cartref" (pwy ffwc sy'n 'sgwennu hynna mewn i Google?) a "ceren tonteg" (yn amlwg Ceren sydd wedi teipio hyn). Ac, o hyd, mae 'na bobl yn teipio mewn "Meic Stevens" a "Meinir Gwilym" ac yn dod yma.

Dw i'm yn dallt hynny. Wedi 'blog' 'hogyn' neu/a 'rachub', y peth mwyaf poblogaidd er mwyn dod yma ydi, un ffact, "Meic Stevens". Wedi'i ddilyn gan "Meinir Gwilym". Od iawn o fyd, ond diddorol, hefyd.

Welish i Dafydd Iwan

Do, yn Harry Ramsdens, misoedd yn ôl. Ond 'sneb yn coelio fi, er imi gymryd llun a phopeth.

Dw i'n rili ypset. 'Sneb yn coelio fi byth.

Dechrau a diwedd

Chei di'm gwell na rwbath yn dod i ben a rwbath arall yn dechrau. Mae'r haf felly imi; pan orffena'r tymor bêl-droed mae Big Brother yn dechrau (llongyfarchiadau i Glyn am ddod yn ail, wrth gwrs, ac am i S4C gynhyrchu un o'r rhaglenni waethaf yn eu hanes), a phan orffenna Big Brother dyma'r pêl-droed yn dechrau drachefn.

Mae pethau'n argoeli'n ddrwg, fodd bynnag. Dw i digon ypset bod United wedi gwario penwmbrath o £18m ar Michael Carrick, ond yn waeth fyth dw i'n cael Dyfed yn penderfynu 'sgwennu llythyron imi (h.y. ripio darn o gylchgrawn allan efo llun o ddynas ddu arno, 'sgwennu 'gŵr chdi' ar y cefn a'i gyrru drwy'r post, i'r enw Iason "Hobbit" Rachub Morgan. Hyn, ebe hwynt, yw'r diffiniad o 'adloniant' yng Ngwalchmai). Ac mai'n bwrw, sydd o leiaf yn codi fy nghalon.

Dydi fy mhlendren i cae dal dim am rhy hir ers tua mis yn awr, sydd o gryn gonsyrn imi, a dw i'n mynd i 'Sbyty Gwynedd Ddydd Llun er mwyn cael ffisiotherapi. Wela i mo'r pwynt; dw i fyth am wella aparyntli. Mae o fel ddyn ar ei wely angau yn cael llwyad o Galpol er mwyn wella'i annwyd.

Hen bryd imi fynd rwan. Dw i'n mynd i Besda heno am beint, ylwch chwi. Ar nos Sadwrn, sy jyst yn sili, achos does neb yn mynd i Besda ar nos Sadwrn, dim ond nos Wener a nos Sul. Yn wir, myfi ydyw Plentyn y Chwyldro.

Obitus Ante Dyfed

Obitus Ante Dyfed ydi arwyddair swyddogol Rachub. Ni wyddwn i hynny o'r blaen.

Fedra i'm stopio i siarad. Wir-yr. Dwisho cawod, achos fe fues i'n Llangefni neithiwr, a mae pawb angen cawod ar ôl noson allan yn Llangefni.

Ffe es i Sioe Mon gyda Kinch a fe welsom Dewi Tal ac yntau a ddangosodd ei syn-tan a'i ddefaid inni. Dwi byth wedi sylweddoli mor fawreddog ydyw bôls meheryn o'r blaen, chwaith. Ond mae'n rhaid 'u bod nhw'n brifo wrth redeg o gwmpas.

Cefais gyri neithiwr. Dyna pam rwyf ar frys. Ta ra!

Y Gorberffaith

Henffych hawddamor, gyfeillion, myfi a ydwyf teimlo'n Gymraeg fy naws heddiw, a phaham lai? Dw i wastad wedi hoffi darllen Cymraeg orberffaith, a bod yn onast efo chi, a fel hynna byddwn i'n siarad taswn i'n ddewin (Iason y Goedwig).

Ydi 'gorberffaith' yn baradocs? Achos perffaith ydi, wel, y di-nam, y gwych hollol digamsyniol na'i threiddir gan gam neu, wrth gwrs, amherffeithrwydd.

Ydi 'gorberffaith' yn gyfystyr ag amherffaith? Oherwydd y mae 'gor-' yn awgrymu gormodedd, ac nid ydyw gormodedd, na'i chroes-air, annigonol, yn berffaith, nac ydynt? Sy'n golygu eu bod yn amherffaith. Yn tydi?

Ffacinel mi ddechreuish i'r blog yma eisiau siarad am be' wna'i heddiw a dw i wedi mentro mewn i Peter Wyn Thomas territory. Ac nid braf mohoni yma.

Dyfyniad Gwirion y Diwrnod #1

Mam: "I've bought some black things from Marks you like to eat."

Myfi: "What?"

Mam: "Er, blueberries."

Anturiaethau Rhys a'r Byd

Mae'r Archdwpsyn ei hun, Rhys Sgwbi, wedi penderfynu mynd o amgylch y byd. Udodd o ddim wrtha i, chwaith. Mae'n cadw cofnod o'i anturiaethau yma.

Genwair Golledig

Pam ydw i'n 'sgwennu'r blog 'ma? Wel, er mwyn i bobl cael chwerthin ar fy mhen i. Un peth dw i wastad wedi sylweddoli ydi bod 'na wastad rhyw anffawd od yn digwydd imi, sy'n ddigon i gadw blog fel hyn fynd ar y distawaf o amseroedd. Yn anffodus, mae ar y funud wastad yn ymwneud â physgota, felly os nad oes gynnoch chi ddiddordeb ewch i ddarllen blog Rhys Llwyd, neu rhywbeth.

Eniwe, mae'n cymryd amser mynd o Fethesda i Fae Trearddur. Mi brynais i 'mbach o sandeels yn Star cyn mynd ymlaen i'r lle a'i chyfeiriwyd ati ynghynt. Wedi gyrru mawr mae'n rhaid i rywun ddadbacio a chario'u genwair a'u abwyd a'u bocs a'u stand a fenthyciwyd gan athro waethaf Cymru a chwilio am rywle i'w chastio. A hynny a wnes, wrth gwrs, wedi bachu’r sandeels ar y bachyn a’r cyntaf gast aeth i mewn i’r Môr Wyddelig (sef, o bosib, y Môr efo’r naws lleiaf Wyddelig bosib). Y genwair a grynodd, myfi a thynnodd, a snagiodd y cont ar rhyw garreg.

Bryd hynny tynnu mae rhywun hyd syrffed er mwyn ceisio ei ddadfachu o’r creigiau, a mae genweiriau yn bethau cryfion sy’n medru delio â hynny. Ond nid f’un i. Ar un tyniad anferthol, dyma hi’n cracio’n ei hanner. Yn ffwcin genwair i. Y peth gorau nad oedd neb o gwmpas i weld (oni bai am ddau mewn cwch na sylweddolasant, mi gredaf), a’r doniolaf beth dw i’n amau dim ond gweld hanner fy ngenwair i’n llithro’n araf ar y llinyn i lawr tuag at y Môr Wyddelig, hanner can llath isod. Safais am eiliad yn ei gwylio, yn hanner eisiau crio, hanner eisiau neindio mewn ar ei hôl.

Torri’r llinyn oedd yn rhaid, agor can o Lwcozêd, ac eistedd efo’r gwynt rhwng fy ngwallt a loes yn fy nghalon.

Y Deintydd

Os nad yw deffro a chodi am hanner awr wedi wyth yn ddigon drwg (iawn, hangowfyr o fod yn fyfyriwyr, ond daliwch efo fi), mae codi am hanner awr wedi wyth yn gwybod dy fod yn gorfod mynd i'r deintydd ym Mangor erbyn naw YN ddigon drwg. Os nad gwaeth. Myfi a es yn blaque i gyd.

Un o'r cas bethau sydd gennyf am y deintydd, oni bai am y drilio cyson, ydi y peth 'na sy'n gwneud sain fel hwfar ac yn sugo pob leithder allan o dy geg. Chychwi a wyddoch yr hyn a soniaf amdani, a dirprwy y deintydd sydd gyda hi. Roedd yr un yma'n chwarae gem o 'faint o'i dafod o fedra i sugno mewn iddo', sy'n ffain, tu allan i ddeintyddfa, ond yno nid yw, yn fy mhrofiad broffesiynol i (onid yw'r ffaith fy mod yn Faglor yn y Celfyddydau yn ddigon yn awr i gyfiawnhau'r fath ollwybodaeth?).

Dyma deintydd yn rhoi rhyw ddei yn fy ngheg i wedyn, i ddangos lle mae'r plaque. Mi oedd llawer. A wedyn mi ges i'r wers 'na dachi'n gael pan dachi tua phump am sut i frwshio'ch dannedd yn gywir. Ffycar iddi. Oni'n teimlo'n rel ffwcin lemon, yn nodio a mynd 'ies' yn boleit iawn o hyd, 'ai si'.

A mae'n rhaid imi fynd yno drachefn am ffiling mewn wythnos neu rwbath. Wel, dydw i'm isho. Felly mi fyddai'n bendantaidd ac yn annifyr a'i chanslo, a dal ati i fyw fy mywyd heb haearn yn fy ngheg.

Bywyd Ddiffygiol

Mae'r 'Steddfod i'w weld yn brysurach na'r arfer tua Abertawe ffor'na. Ond fydda i ddim yn mynd achos 'sgen i ddim pres. Dim ots, rili, achos bob tro dw i'n mynd i Abertawe dw i'n endio fyny'n dod o 'na heb gofio diawl o ddim, eniwe, a synnwn i'n fawr tasa hynny'n wahanol pe fyddwn i'n mynd flwyddyn yma.

Oeddwn i am fynd i 'sgota ddoe ond mi benderfynodd Dyfed y byddai'n well ganddo fflachgachu. Felly mi gefais fwyd yn lle Nain yn lle, yn llawn mwynhau ei sylwadau diddiwedd, fel 'sbia hwn yn gwatshad bob dim dw i'n neud' am fy nhaid, oedd dim ond yn edrych a sy ddim yn deall Cymraeg. Dw i'n gwybod fod o'n gas, ond, dw i wrth fy modd yn dweud pethau am bobl yn y Gymraeg a gwybod yn iawn nad ydyn nhw'n dallt gair o'r hyn dw i'n ei ddweud.

Yfory rwy'n mynd i'r deintydd. Nis hoffaf y deintydd. Maen nhw'n cwyno bod fy nannedd yn or-felyn o hyd, cyn mynd ati i holi os ydw i'n yfed gormod, ysmygu neu gwneud pob math o rhyw bethau anwar anghywir felly. Er, dw i'n ddigon gelwyddar ac ystrywgar i gadw'r gwir, pa wir bynnag ydyw, oddi wrthynt. Ond fel nad yw coes croc a sbecdols yn ddigon i anharddu rhywun, mae dannedd melyn yn, felly mi a'i 'fory mewn hyder da.

Yn ogystal a hyn mae gennai'r ffisiotherapydd yn ddiweddarach yn y mis, felly bydd hynny'n hwyl, wrth imi gael fy mhlygu blith-draphlith hyd torri a rhwygo pob peth yn fy nghorff. Bastads.

Ychafi

Heddiw fe fu imi cymryd llond ceg o mozzarella o cefn ffrij, cyn sylweddoli ei bod hi gyd wedi llwydo ac yn blasu fel llwch Iddew.

Y Ffrae Fawr a degawd bach arall ichwi

Bonjour, ys dywedaf pe fyddwn rodresgar (dw i'm yn wirioneddol gwybod beth mae rhodresgar neu'r Saesneg amdano pretentious, yn ei olygu, ond mae pobl wastad yn dweud 'paid a bod yn pretenshys' wedi clywed rhywun yn dweud rhywbeth mewn Ffrangeg).

Mae'r dyddiau diwethaf wedi eu lliwio gan ffrae mawr. Anghofiwch Libanus ac Israel ac Hezbollah, myfi a Kinch sydd wedi bod yn dadlau am bysgod. Efe, Fodedern-wr, sy'n honni mai coaley y bu inni eu dal y diwrnod o'r blaen. Myfi sticiaf at bass. Rwan, os oes rhywun yn darllen sy'n dallt y petha' 'ma, plis ymatebwch neu mi fydd y ffrae yma'n mynd hyd diwedd ein dyddiau (wel, ei ddyddiau ef, dw i'n llawn eisiau parhau gyda'm mywyd trist a phrudd, a goroesi pawb dw i'n adnabod, jyst er mwyn fod yn fastad).

Annhebyg iawn y gwna i oroesi neb, wrth gwrs. Dw i bob amser wedi teimlo mai Mis Mawrth y bydda i'n marw.

Eniwe, i'r rhai ohonoch sy'n darllen y blog hwn, ac felly'n amlwg yn cymryd rhyw fath o ddiddordeb yn fy modolaeth (yn hytrach na bywyd, hynny yw), efallai y cofiwch mai hwn yw'r degfed flwyddyn yr wyf wedi bod yn cadw dyddiadur. A hithau'n Awst 2ail, dw i am weld be wnes bob diwrnod am ddegawd.

• 1996: 'No record of what happened today'. Dechrau da.
• 1997: Mynd i Gaergybi. Oni'n 'bored'.
• 1998: Unwaith eto, does dim manylion yma. Bob amser wedi meddwl bod Awst yn boring ond blydi hel...
• 1999: 'Mellt a tharannau'. Storm, debyg.
• 2000: Ymlacio drwy'r dydd a chodi am 11.34
• 2001: 'Mae gen i lai i ddweud bob dydd' (a phob blwyddyn, debyg)
• 2002: Cyrraedd adref o'm gwyliau yn Yr Eidal, wedi casau y gwyliau'n llwyr, un o benwythnosau gwaethaf fy mywyd
• 2003: Hei, guess what? Dim cofnod.
• 2004: Ffeindish i allan y byddwn yn ennill £60 am weithio'n Steddfod Casnewydd ... sef £105 yn llai na ddywedish i wrth Mam y byddai'n ennill. Wps.
• 2005: Blwyddyn i heno, eshi weld Mim Twm Llai yn chwarae yn Cofi Roc. So mai'n flwyddyn ers imi weld Mim Twm Llai mewn gig.

Casgliad: ar y cyfan, mae Awst yr 2ail yn ddiwrnod boring.

Canolfan Byd Di-Waith

Haleliwia! Mae gen i reswn ddilys i gwyno!

Ond rheswm drwg. Roedd yn rhaid imi ffonio fyny Canolfan Byd Gwaith Wrecsam fyny heddiw, a mi wnes ar y linell Cymraeg. Fe fues i'n disgwyl ugain munud cyn rhoi'r ffôn lawr a ffonio am y linell Saesneg, lle cefais i rhywun yn ateb o fewn dau funud. Yn lythrennol.

Felly dw i'n flin a dw i am gwyno a gwneud ffys mawr. Dio'm yn deg, nadi?

Penwythnosa

Fel un o Besda, nos Wener a nos Sul yw fy mhenwythnos. Anaml a'i allan i Fethesda ar nos Sadwrn. Felly, fel arfer, nos Wener a nos Sul es allan. Oeddwn i'n eithaf siomedig neithiwr am na chafwyd loc-in yn y Vic, a dylwn wedi aros yn yr annwyl Sior, mi gredaf, er y bu imi bron a lladd hen ddyn wrth y tai bach (stori byr).

Er hyn dw i heb wneud llawer dros y penwythnos, a heb actiwli meddwi. Dachi'n gwybod y teimlad gwaetha? Ceisio yfed a methu achos unai bo gynnoch chi ben mawr (nid yn lythrennol, bydda chi'n yfed mwy efo pen mawr mi dybiaf) neu eich bod newydd bwyta clamp o bizza. Dyna wnes i, wrth gwrs.

Deep pan ydi'r boi. Dw i'm yn dallt y wimpy weeds bach sy'n cael thin cryst. Deep pan ydi pizza dyn go iawn. Digon o gaws, digon o dopping, a stumog llawn. Mae thin cryst fel y cwrw ddialcohol 'na, neu fel tost heb fenyn neu Llafur heb y streak gwrth-Gymraeg. Ddim yn iawn. Annuwiol. Ffiaidd. Anfad. A phawb a'u bwytant. Dachi'n gwybod pwy ydach chi.

Iasgob mae'r blog 'ma'n dirywio.

Anlwc

Mae rhai pobl yn lwcus; ennill y loteri, ffeindio tenar ar lawr o bryd i'w gilydd, wastad yn rhoi'r tostar ar y setting cywir. Nid myfi. Dw i'n berson anlwcus iawn ar y cyfan, rhwng pennau gliniau (ydw, dw i dal i gwyno am hynny) a mynd i bysgota a sylweddoli ar garreg bod handlen y rîl wedi disgyn off yn Duw a ŵyr ymhle (sydd, os ydych chi'n deall pysgota, yn golygu nad medrwch bysgota).

Blin oeddwn y bore 'ma hefyd yn derbyn drwy'r post gwrthodiad o'm cais am fudd-dal analluogrwydd. Dw i'n iawn rwan, wrth gwrs, ond am dros fis doeddwn i ddim ac yn methu gweithio, a gwrthodwyd y budd-dal ar y sail nad oeddwn i wedi gweithio digon yn ystod y ddau flynedd ddiwethaf er mwyn ei haeddu. Wel, naddo, ffycin myfyriwr ydw (oeddwn) i. Taswn i'n iach byddwn i wedi medru gweithio a chael arian a medru talu'r hanner-rhent o £125 am y tŷ yng Nghaerdydd am y mis ond na, nis medrwn. A dydi o'm fel fy mod i'n rhyw sgyman oedd yn ffugio, a dydw i'm ychwaith wedi mynd ar y dôl fatha llwyth o bobl dw i'n abod. A dw i'n flin iawn.

'Sdim lwc yn digwydd imi fyth. Bu imi ennill £12 ar scratchcard unwaith (a'i wario oll ar all you can drink for a tenner yn Yates yn syth bin). Ffwcin mynadd.

Y Pysgotwyr

Bydd lot o'r blog yma dros yr haf yn cael ei ymrwymo i'm hanesion bysgota, mi gredaf. Ddoe, tua Bae Treaddur yr es, gyda Dyfed a Kinch (yr un blewog a'r un jinjyr). Kinch ddywedodd bod 'na rywle yno o'r enw Mackrel Rock, er chafon ni fawr o facrell a dweud y gwir. Dim ond draenogiaid.

Na, dw i'm yn malu cachu; fe fu inni ddal chwe draenog ym Mae Treaddur. Ond, i chwi'r rhai ddi-Gysgeir, mae draenogiaid, yn ogystal a meddwl y creaduriaid pigog sy ddim yn fod i yfed llefrith ond mae pawb yn ei roi iddyn nhw bethbynnag, yn golygu bass. A dw i'n dallt yr enw, hefyd, oherwydd mae gan y bygars bigau ar eu cefn a bu inni gyd cael ambell i nip annifyr ganddynt (yn eu cael yn ol drwy waldio'u pennau a'u diberfeddu). Er, bu imi'n bersonol golli dros hanner fy 'traces' a phwysynnau.

Ar y pryd doedden ni ddim yn sicr beth yn union oedd y petha 'ma. Dw i byth wedi gweld draenog o'r blaen. Ond mi es tua Gwalchmai (sef y lle mwyaf stiwpid yn y byd, sy'n cynnwys capel o'r enw Capel Coch sydd ddim yn goch ac Eglwys Gatholig sydd yn edrych fel bwthyn). Nyni a goginiasom ddau o'r rhain i de, heb y syniad cyntaf o sut mae di-esgyrnu pysgod na dim, a mi lwyddais innau lyncu mwy o esgyrn na sy'n iach (ac o'i herwydd dw i wedi rhoi off mynd i'r lle chwech am cyn hired a sy bosib).

Yfory dw i'n cael fy mlas gyntaf ar bysgota llyn yn Llyn Alaw, a heno mae Grandad yn coginio y ddraenog fwyaf a ddaliais (dau bwys a hanner) a mi a'i fytaf i de.

Yahahahha Gandalf!

Cyri cangarw

Ffacinhel mai'n boring 'ma. Does gen ddim i'w wneud ond hel llwch ar fy sbecdols a gweiddi 'aw!' bob tro dw i'n cymryd cam gam.

Y nos ydi'r waethaf beth yn y byd. Eshi gwely am naw neithiwr a gwylio Bad Girls am awr, cyn y crap annioddefol ond adictif o'r enw Big Brother, ac wedyn Gordon Ramsay's F-Word cyn ceisio cysgu. Mi wnaeth imi feddwl am fwydydd egsotig.

Triodd Gordon grocodeil neithiwr, a hoffwn innau wneud hefyd. Eithaf prin, mewn difri, yw fy mhrofiad o fwydydd gwahanol: estrys a siarc ydi'r mwyaf mentrus ydw i wedi bod, er mae gennai restr o'r hyn beth hoffwn eu blasu. Ci, er enghraifft. Os mae o'n ddigon da i Korea, ma'n ddigon da imi (dw i'm am hyd yn oed mentro gwneud jocs sal am hot dogs). Zebra, hefyd: strips streips, efallai? Cangarw hefyd, oeddan nhw'n gwerthu cyri cangarw yn Llanberis ychydig yn ol dw i'n cofio. Siwr bod 'na ddigon o gic iddi. HA!

Iesu dw i angen job.

Pysgodio!

Dw i erioed wedi bod yn hoff iawn o bysgota, ers fy mod yn sbrog a'm cefnder Arfon yn mynd a fi i bob mathia o lefydd; Caergybi, Llanddona, Moelfre, i bysgota. Afraid dweud prin iawn fy mod innau'n dal dim ond gwymon a bagiau Tesco, ond dal hwyl a gefais. Efallai bod ar gof rhai ohonoch fy mod wedi ailgydio yn y pysgota flwyddyn diwethaf, a bob tro yr oeddwn i'n cyrraedd traeth cyrraeddodd hefyd y trai. Ond ddoe cefais y fraint(?) o gwmni Dyfed, sydd byth wedi pysgota yn ei fywyd, a mynd dros y bont i Fôn i ddal pysgod. Ym Miwmares bu inni brynu ddigon o lygwns a sliwennod tywod i wagio Afon Menai.

Ffwrdd â ni felly, thua Penmon, a chael hyd i le bach da imi gael dysgu'r Dyfed yr hyn oll a wyddwn am bysgota. Wedi lwyddo dysgu iddo gastio'i wialen (oedd yn ddigon pell mewn i fedru dal crancod, o leiaf), deuchreuon ni ar y pysgota go iawn. Buan iawn y bu inni sylweddoli bod yna ddigon o bysgod yno, ond y rhai bach 'na sy methu llowcio bachyn ond yn medru'n iawn cnoi'r abwyd. Felly aethon ni i Fiwmares ar y pier.

Wedi dioddef llwyth o bobl yn gofyn 'ydach chi wedi dal rhywbeth?' dechreuon ni golli ychydig o fynadd. Er, mi lwyddais ddal pysgodyn, o leiaf;

Oeddwn i braidd yn anhapus gyda'r bachiad felly mi benderfynais i ddefnyddio'r bach fel abwyd (ac o fuan fe'i rhwygrwyd gan eraill bysgod y môr), a hwythau'n dianc fy machyn, ond mi oedd o'n ddiawl o lot well na be ddaliodd Dyfed ...

sydd, hyd yn oed ar eich cyntaf drip bysgota, ddim yn drawiadol iawn. Fodd bynnag, yn flinedig ac yn siomedig llwyddon ni gyrraedd Spar Biwmares a phrynu rhywbeth i fwyta (aethon ni i'r siop Sglod a 'Sgod lleol ond roedd hwnnw wedi cau, a Biwmares oll yn ein erbyn yn dal unrhyw fath o bysgodyn call - hyd yn oed o Neptunes), oedd yn drewi o lygwns. Adra euthum yn y diwedd, yn benderfynol o rhyw ddiwrnod ddychwelyd, a dod a bri bysgodol yn ôl thua Rachub fach a Gwalchmai.

Galwadau amheus

Os dach chi newydd ymuno gyda fi, lle ddiawl fuoch chi ar hyd y tair mlynedd diwethaf? Gynnoch chi lot o ddal fyny i'w wneud...

Llawn ddisgwyliaf i bawb poeri eu dirmyg arnaf, a'm cnoi gan llid cyn fy mhoeri allan drachefn, ond dw i'm angen gwybod beth mae pawb arall yn wneud. Y gyfrinach i beidio a bod yn gefnigennus ydi peidio a chymryd diddordeb ym mywydau neb arall. Dw i'n ffeindio hynny'n hawdd iawn gwneud ('sdim pwynt smalio fy mod i'n adnabod pobl diddordol. Dw i ddim. Mae fy ffrindiau i'n cynnwys ffermwyr blin, jinjyrs lu, ffrîcs drwynfawr a phobl o Bontypridd), ond dim pam y caf i fy ffonio am hanner awr wedi pedwar yn y bore ym Methesda gan bobl yn cael hwyl yn Abersoch. Ie, Dyfed y Blewfran a'r self-styled 'Fôn y Pry', yn camddweud lyrics yr Irish Rover a dweud 'reu' hyd syrffed.

Piti 'fyd. Bu imi anghofio bod Wakestock ymlaen, felly penwythnos da a gefais. Oni bai am fod yn hollol hamyrd nos Wener (mi ganais am ben cadeiriau yn Nhŷ Isaf; ia, efo crytsh) a mynd i weld Jac yn y Bocs nos Sadwrn yng Nghlwb Rygbi Bethesda a chwerthin hyd syrffed. Noson gwahanol allan, am unwaith, a bu imi fwynhau. Dw i'm yn un am y theatr, rili. A dweud y gwir, mae'n gas gennai theatr, ond mae hiwmor budur a rhegi bob amser yn codi fy nghalon.

Heddiw, dw i am wneud byrgyr imi'n hun ar y barbiciw i ginio, a threulio'r prynhawn yn diawlio'r ffycin haul. Casau'r haf.

Corddi

Dw i'n casau peidio gwybod pethau. Cefais i nodyn bodyn neithiwr yn dweud MAE GEN I SBOT AR FY NHIN gan rif anghyfarwydd, ac er cyn gymaint a dw i'n meddwl mai Dyfed oedd o wn i ddim go iawn achos dw i methu ffeindio allan. Oeddwn i wedi synnu pa mor ddig oeddwn i yn methu gwybod pwy oedd y person 'ma, dw i'n siwr bu bron imi gael hartan. Mi ffonia i nhw eto heddiw a gweld. Grr.

Es i'r ysgol ddoe i weld yr hen athrawon yn Nyffryn Ogwen efo Helen, a sylwi bod Dyffryn Ogwen yr un mor wael o le ag erioed, a'r athrawon dal yn edrych yn eitha iwsles (haha, sori), yn gwneud dim ond pori blog y Kymro Kanol a brolio am ba mor hei-tec ydi'r ysgol rwan. A mae o, efo ryw projectors ar y byrddau gwyn a bobmathia. Da iawn nhw.

Mai'n unarddeg y bore a dw i'n synfyfyrio am beth wnai. Yn ddiweddar dw i'n meddwl fy mod i weld ymweld a bob un peth yn Wikipedia tua dwywaith drosodd, a gwylltio am y pethau lleiaf (fel tecsts anhysbys). Mae bod yn ty am wythnosau yn gwneud i rywun gael short ffiws a mynd yn ddig am y pethau lleiaf. Mi ymwaredaf ohoni drwy wneud bechdan beicyn mi gredaf. Hwyl!

Dr. Sion

Hoho oeddwn i jyst rwan yn mynd drwy fy llyfrau bras o Ysgol Dyffryn Ogs a sylweddoli pa mor gas oeddem ni oll efo'n gilydd, yn amlwg doedd gennai fawr o feddwl am Jarrod...

na Sion...

nac ychwaith dyfodol yr hen Sion druan...

Sbit imij o Gwawr, actiwli.

Hogyn o Rachub BA

Da dwi!

Son am gywilydd! Mynd o flaen miloedd o bobl (go iawn) i ysgwyd llaw yr is-ganghellor (sy'n siarad Cymraeg fel Almaenwr efo annwyd) gyda crytsh. A Dad yn gweiddi allan tra fy mod i'n llusgo ar draws y llwyfan fel malwoden ar Nytol. Mamma mia. Byth eto, diolch i Dduw. Dw i'n BA. A mae'n teimlo'n eitha normal, a diddorol clywed enwau canol rhyfedd pawb arall na wyddais cynt (Huw Peris!!!!!!)

Eniwe mi gurodd Yr Eidal Gwpan Y Byd a dyna'r peth pwysicaf. Mi wyliais i o'n hotel efo Dad, drws nesa' i ryw bobl od nad hoffais. Aros yn Holland House oedd y teulu, poni welwch-chwi, sy'n le eithaf drud, ac yn amlwg iawn nid nyni oedd yr unig rai yno yn ceisio edrych yn gyfoethog ond ddim. Oedd y rhai wrth ein hymyl yn amlwg yn bobl efo 'mbach o bres ar yr ochr, ond eto heb ronyn o urddas na diwyg iddynt.

Tasa gin i bres, byddwn i'r person mwyaf urddasol yn y byd a fydda gin i fonoglass a bwstash mawr llwyd (am rhyw reswm yn ddiweddar dw i wedi bod yn galw mwstash yn bwshtas achos ma'n swnio'n well) a thop hat. Beth bynnag, dyma'n fi'n Rachub drachefn am oes pys, felly gwell imi beidio breuddwydio gormod.

Mam a'i STD

Aeth Mam i Argos heddiw a chael cynnig STD. Chwarae teg, mi brynodd gamera digidol newydd i mi yn sbesial oherwydd fy mod i wedi llwyddo cael gradd, a chafodd gynnig STD gan y ddynes tu ol i'r til. Medda hi, ddynas wirion. STU port oedd o, a dyma Mam yn fy ngalw i yna i dweud os oeddwn i isho un, a na medda fi. A dyma hi'n egluro wedyn pam y bu iddi fy ngalw, achos nad oedd hi'n gwybod 'beth oedd STD', cyn mynd ymlaen i ofyn imi os oeddwn i, a gofyn i Dad (a ddywedodd "na", yn amlwg ddim callach rhwng STD ac STU port ei hun).

Reit, dw i'n mynd i Gaerdydd mewn 'chydig. Graddio 'fory. Casau'r lol graddio 'ma. Dw i'n fodlon fy mod wedi pasio a dyna ni, dw i'm yn licio'r holl seremoni sy'n mynd efo hi. Ond dyna ni, gyda Mam wedi ordro DVD ac wrth gwrs llwythi o luniau ac ati, byddaf i ar y llwyfan 'fory, efo ffwcin crytsh. Iesu maesho gras a mynadd.

Meistr y Gegin

Dw i'n wych. Na, go iawn, mi dw i yn. Mae'n sgiliau coginio i yn gwella o hyd ers blynyddoedd, ac yn sicr wedi gwella ers dechrau prifysgol (o ffyc, dw i'm yn prifysgol ddim mwy nadw? God, mae amser yn mynd yn sydyn pan ti'n blogio) achos bod yn rhaid imi. Mi wnes fy hoff saig heddiw, Chille Con Carne. Hi yw'r peth gorau y medraf i ei choginio, ac unwaith eto roedd Dad a'r chwaer wrth eu boddau. Dw i'n wych hefyd ar wneud cawl, cyri a thost, ac mae wedi ei nodi sawl gwaith gan sawl un amrywiol fod fy nhatws mash ymysg y tatws mash gorau a geir. Ia, go wir.

Felly oeddwn i'n meddwl i fy hun yn y gegin, wrth wrando ar amrywiol ganeuon y llapllop (sy'n cynnwys bob math o gerddoriaeth amrywiol, o Dafydd Iwan i Beethoven i Kentucky AFC ac i 'Mama Get The Hammer There's A Fly On Papa's Head'), faint ydw i wedi newid ers prifysgol? Wedi'r cyfan, dechreuais flogio dros dair mlynedd yn ol bellach, a cofnod o fy amser yn y brifysgol ydi hi, a dweud y gwir. Ond dw i wedi newid, rhywfaint:

• Mae fy Nghymraeg ysgrifenedig yn well o lawer. Sydd fawr o sioc o ystyried mai Cymraeg y bues i'n ei hastudio ('bues', marw isho dweud 'yn astudio'!)
• Dw i'n dewach. Tua tair ston yn dewach.
• Mae gennai sbecdols, a dw i'n edrych yn geeky (os nad yn oleuedig)
• Am rhyw reswm, dw i'n meddwl fy mod i'n fyrrach.
• Dw i'n hoffi lagyr. D'on i ddim cyn mynd i brifysgol.
• Cyn mynd i Gaerdydd oeddwn i'n feirniaid gwael iawn o gymeriad. Erbyn hyn dw i'n llawer craffach (o bosib oherwydd fy sbecdols o dair diwrnod)
• Dw i'n ynganu 'Carling' fel 'Cahlehn' pan dw i'n siarad Susnaeg
• Mae'n Susnaeg ysgrifenedig a llafar yn waeth, ac a dweud y gwir dw i'n meddwl bod fy Nghymraeg llafar yn waeth hefyd
• Dw i dal ddim yn gwybod be 'di ansoddair (dydi hynny ddim yn newid, nacdi?)

Felly dyna ni. Dw i wedi datblygu i fod yn hen lanc od iawn ar y cyfan. Hir oes i mi, uda i.

Symud Ymlaen

Mae pethau'n symud ymlaen gyda fi. Dw i wedi cael Scan MRI ac wedyn heddiw dw i'n mynd i nol fy sbecdols o Fangor. Jason pegleg sbeccy four-eyes go iawn y byddaf. Er, fe fydd hi'n neis medru darllen yn gall unwaith eto. Mae'n rhaid imi ddefnyddio'r sbecdols i ddarllen, gwylio'r teledu a mynd ar y cyfrifiadur. Sydd, ar y funud, drwy'r dydd oni bai am pryd dw i'n cysgu.

Echnos roeddwn i'n Bodedern, am y tro cyntaf ers talwm, yn gwylio gem Yr Eidal a'r Almaen. Kinch rhoddodd wadd imi yno, fynta'n gefnogwr brwd o'r Almaen, a minnau o'r Eidal. Felly dyma ni'n dau yno'n gwylio'r gem, fi yn gwisgo crys yr Eidal a fynta'n ei grys Almaen, yn edrych fel bo Hitler a Mussolini wedi mynd am beint gyda'i gilydd. Dim ots rili, achos Yr Eidal oedd y gora. Ha!

Reit, dw i'm wedi cael brecwast felly mi af i wneud hynny. Dim mwy i adrodd ddim mwy, dachi'n gweld.

Henoed

Nefoedd mae pethau''n anodd arnaf. Dw i'n gwybod sut mae hen bobl yn teimlo rwan. Ers dyddiau maith, ac wythnosau, wrth gwrs, yr unig beth alla' i wneud ydi mynd ar y cyfrifiadur, wedyn ar y llapllap, wedyn gwylio fideo dwi'm isho gwylio (gwyliais i James and the Giant Peach diwrnod o'r blaen am awr a hanner. Roedd y llun yn rhy dywyll ond doeddwn i methu ffiguro allan sut i'w newid) cyn mynd i'r ardd i edrych ar bethau. A dydi shed a gwair fawr o'm byd i edrych arnynt.

Y peth waethaf ydi fod fy ymennydd yn dechrau pydru'n ara' deg. Dw i heb ysgrifennu cerdd ers misoedd, a mae pob ysbrydoliaeth wedi mynd. Fydda i'n hoffi 'sgwennu cerddi (yn Gymraeg, wrth gwrs, mae cerddi Susnag yn od. Dydi iaith y Sais ddim yn iaith farddonol) ond dyna ni. Dw i'm yn berson sylwgar iawn. Clwyddau, actiwli. Dw i'n sylweddoli yn y pethau drwg o hyd; dyna mae pawb yn ei ddweud. Chi'n gwybod, dw i'n cofio rhyw hogan yn gofyn imi o'r blaen (dw i'm yn cofio pwy) os oedd hi'n edrych fel sguthan 'di gwisgo fel oedd hi. Wel wyt, atebais innau'n onast, a dyma hi'n pwdu efo fi. Ydi o mor ddrwg dweud y gwir fel mai?

Y gwir fel mai ar y funud: dw i'n ddiflas ac wedi blino o hyd, ac yn fy ngwely cyn 10 o'r gloch bob nos (i gael 'setlo mewn'). Crunchy Nut Cornflakes a phanad gyda'r bore. Syllu ar bethau drwy'r dydd. MRI scan 'fory, edrych 'mlaen imi gael gwneud rhywbeth arall am unwaith.

Mynd drot drot

Wel, herc herc eniwe. Dw i wedi dechrau mynd am dro 'rownd y bloc' er mwyn gweld pwy sy o gwmpas y lle, a chael ambell i sgwrs efo ambell i berson. Er, dw i'n cael trafferth ysgrifennu hyn. Dw i'm licio cyfaddef ond mae darllen yn anoddach ers cryn dipyn a dw i'n eitha balch rwan fy mod i'n cael sbecdolion. Os dwi'n cau fy llygad dde, fedra i ddim darllen hwn efo'r chwith. Casau llygaid chwith.

Diolch i Dduw bod gemau Cwpan y Byd wedi ailddechrau drachefn. Fel efallai y gwyddoch, Yr Eidal yw fy nhîm i, gan fod Nana'n Eidales ac am nad ydi Cymru byth mewn unrhyw gystadleuaeth fyth. Iawn, so dw i'n hanner-Sais, ond chefnoga i fyth mo Lloegr. Ych, mae gweld bob man wedi plastro efo'u fflagiau a'r teledu yn son am ddim arall wir yn troi arnaf. Dw i'n gobeithio bod Portiwgal yn curo heddiw a'i bod yn BRIFO.

C'mon Portiwgal!

Sydyn-newyddion

Dw i'n licio rhannu fy mywyd efo chi. Dw i wedi bod yn gwneud ers tair mlynedd namyn pum diwrnod. A mae pethau dal yn boring. Ond dywedwyd i mi heddiw fy mod i yn y wars. Licio'r dywediad. Ond mi es i'r optegydd, ac yn ogystal a chael goes giami dw i'n awr yn gorfod cael sbecdols. Geeky Jês, dyna fyddan nhw'n fy ngalw, gewch chi weld.

O ia, mi darfodd hynny ar draws y newyddion da fy mod i wedi llwyddo cael 2:2 (ond mae Lowri Dwd a Lowri Llew wedi hefyd, sydd efallai'n dangos faint o hawdd ydi'r byd addysg uwchradd ar y funud). Athro dall ddisymud fydda i, gewch chi weld.

Fy ngwlad! *rant blin*

Fy ngwlad, fy ngwlad cei fy nghledd
Yn wridog dros d'anrhydedd,
O gallwn, gallwn golli
Y gwaed hwn o'th blegid di.
Wylit, wylit, Lywelyn
Wylit waed pe gwelit hyn!

Gwychder gan Gerallt Lloyd Owen. Bob amser wedi licio GLO. Mae rhai yn dweud bod o i gyd yn 'Gymru hyn, Cymru llall' ond be di'r ots efo hynna? Ond pwy ellith ddweud go iawn nad ydyn nhw wedi darllen un o'i gerddi a chael 'mbach o ias lawr eu cefn, neu dim ond wedi meddwl 'hm, ti'n iawn'? Neu beth am 'Hon' neu 'Preseli' neu 'Cyngor' neu hyd yn oed 'Enaid Owain ab Urien' a pheidio â rhoi ailystyriaeth i'r hyn sy'n cael ei ddweud.

Dw i'n cael fy ngwylltio a'm siomi gan y Cymry o hyd, fel cenedl, ac fel unigolion. 'Dan ni mor wan. Pan bleidleisiodd Montenegro am annibyniaeth, beth oedd tu ôl iddi ond balchder cenedlaethol? Pam fo'r Basgiaid yn ymladd o hyd? Pam fo hyd yn oed yr Alban o'n blaen? Pe fyddai refferendwm annibyniaeth yng Nghymru, dw i'n sicr y byddai mwy o gefnogaeth iddi nag ydym yn credu, ond byddan ni dal ddim yn annibynnol. "Byddan ni'n dlawd", "eith yr NHS i'r diawl", "bydd gynnon ni llais gwannach tu allan i Brydain". Gesiwch be? Mi ydan ni'n dlawd. Mae'n NHS a'n system addysg ni yn y baw. A does gynnon ni ddim llais tu fewn i Brydain, heb son am du allan iddi.

A dyna sy'n fy ngwylltio am y Cymry. Dw i'n abod digon o Gymry felly; cenedlaetholwyr pan fo'r rygbi ar, neu efallai wrth ganu ambell i 'Yma o Hyd' feddw yng Nghlwb Ifor. Ond na, annibyniaeth, Deddf Iaith, fe gaiff y rheiny fynd i'r diawl ganddyn nhw. A dachi'n gwybod pam? Achos dydyn nhw ddim yn gwybod dim am hanes Cymru. Fe brynodd Mam lyfr imi am hanes Cymru ddoe, imi gael darllen. Ond er ei bod flynyddoedd yn ôl, bellach, dysgu rhywfaint am hanes Cymru, a'm trodd i tuag at genedlaetholdeb. A dw i yn sicr, heb unrhyw amheuaeth, pe fyddai pobl Cymru yn gwybod am eu hanes, fe fydden nhw'n genedlaetholwyr hefyd.

Be wyddant am y Deddfau Uno neu'r Llyfrau Gleision? Beth am Dryweryn, hanes ein tywysogion Saesneg neu'r nifer weithiau y mae Cymry wedi marw yn rhyfeloedd Lloegr? Beth am y rhai aeth i'r carchar er mwyn iddyn nhw dderbyn addysg Gymraeg neu gael yr hawl i achos llys yn Gymraeg? Ydyn nhw'n cofio na gafodd y Cymry byw mewn trefi yn eu gwlad eu hun, na chael swydd oni bai eu bod nhw'n siarad iaith gwlad arall? Beth am Streic Fawr y Penrhyn neu Streic y Glowyr? Ydyn nhw hyd yn oed yn cofio unrhyw beth am Lywelyn neu Glyndŵr?

Ydyn nhw mor drahaus fel eu bod nhw'n fodlon anghofio bod miloedd ar filoedd o Gymry, eu cyndeidiau nhw, wedi marw er mwyn EIN rhyddid, EIN hawl i siarad Cymraeg, EIN hawl i gynnal ein gwerthoedd ein hun? Na, dydyn nhw ddim. Ac mae hynny'n warth, yn fy marn i.

A dw i'n llai o Gymro na'r un ohonyn nhw. Hanner-Sais dw i. Ond mae nifer o genedlaetholwyr ddim wedi bod yn Gymry pur, fel petai: cafodd Dafydd Wigley a Saunders Lewis eu geni yn Lloegr, ni siaradodd Gwynfor Evans Gymraeg tan ei fod yn ddeunaw. Ac eto sbïwch ar y Cymry Cymraeg pur yn ein mysg, heddiw a ddoe: Elwyn Jones, Dafydd Elis-Thomas, David Lloyd George, Rhodri Morgan - bradwyr, a Chymry pur. Mae'n dweud llawer mai Cymry pur yw'r mwyaf euog o boeni lleiaf am eu gwlad.

Wn i ddim. Roedd jyst cael llyfr hanes Cymru o'm mlaen i; hanes dwy fil o flynyddoedd o ormes, o golli tir, ac o frwydro yn erbyn y Saeson, mewn difri; roedd o'n ddigon i fy nghorddi i am ba mor ddi-ots ydi cymaint o bobl, nifer ohonynt dw i'n ffrindiau efo nhw, sydd efo dim ots am Gymru. A fe’m synnwyd faint o flin a dig oeddwn i’n teimlo. Ac oeddwn i angen cael hynna oll off fy mrest.

Mewn newyddion eraill, mi gysgais i efo fflamingo, mynd i hang-gleidio dros Dudweiliog a chael iau newydd

Anabledd Swyddogol

Rhaid imi aros oddi-ar-lein rhwng un a phump heddiw. Mae'r pobl disabiliti yn ffonio. Mae'n rhaid imi gyfaddef nad oedd i byth yn meddwl y byddai hyn yn digwydd imi, ond bydda i'n cael beneffits dros yr ha'. Wedi'r cyfan, mae gennai filiau rhent i'w dalu am Caerdydd, a fedra i ddim gweithio. Sy'n golygu, wel, dw i'n swyddogol yn anabl. Dyna od.

Mae pethau'n mynd o ddrwg i waeth hefyd, achos ma'n rhaid imi fynd i'r optegydd Ddydd Mercher. Mae rhan fwyaf o hogia'r tŷ heddiw off i Alton Towers, 'fyd. Gytud. Dw i bob amser wedi bod isho mynd yna fy hun. Yn Ysgol Dyffryn Ogwen oeddan nhw'n trefnu tripiau diwedd pob blwyddyn er mwyn mynd, ond bob blwyddyn erioed rhois i'r arian i mewn yn hwyr, ac rwan dw i'n styc yn Rachub yn rêl Wil Goes Bren. Hitia befo, ys dywed y tyddynwr.

Reit, dw i wedi cwyno a dw i'n teimlo'n well o lawer. Diolch i Dduw am gwyno, ne fyddwn i ar goll.

Taflud bwyd am ben to a ballu

Mae'n od gweld o ba ran o'ch teulu yr ydych chi'n hawlio rhai nodweddion penodol. Dw i'n gwybod fel ffaith bo fy hiwmor i (er gwell neu gwaeth) yn debyg iawn i un fy modryb, Rita, yn hytrach na neb arall yn y teulu. Fysa Dad yn licio meddwl ei fod yn eitha' ffraeth ac ati, ond fel y gwyddem, dydi'r geiriau 'tad' a 'ffraethineb' ddim o'r un hedyn. Ond mae Rita'n ddynes od. Dw i'n cofio y deuthum ni adra o rywle o'r blaen a mynd rownd cefn y tŷ a synnu bod rhywun wedi peintio'n berfa ni'n wyrdd tra ein bod ni allan. Ia, Rita.

Mi es draw am banad ddoe. Mae ardd Rita yn edrych ar draws Tyddyn Canol oll. Mae 'na tua naw o dai yn Nhyddyn Canol, ac o'r naw mae'r un pobl wedi byw ymhob tŷ namyn tri ers fy ngeni i. Mae fy Nain Eidalaidd mewn un, Rita a'i theulu mewn un arall, ac wedyn mae tŷ ni ar yr ochr (dydan ni'm yn Tyddyn Canol yn swyddogol, ddo). Felly dyma ni'n yr ardd, fi, Rita, Norman a Nana. Roedd Nana'n cwyno bod y gwylanod fel bleiddiau a'i bod hi ddim isho mynd i Southport heddiw achos doedd hi'm isho codi'n rhy fuan, a'i bod isho gwyblio Coronation Street am saith.

Fodd bynnag, rwbath mae Rita'n licio'i wneud ydi bwydo'r adar (sef gwylanod ac ambell i jac do yn Rachub). Roedd hi'n egluro ei bod hi'n taflu bwyd weithiau am ben to ein cartref ni (sydd o fewn pellter lluchio yn hawdd) a gweld yr adar yn heidio ar y to, a chael Dad i feddwl be ddiawl sy'n digwydd efo'r trempian uwch y nen. Un dwl 'di Dad, felly mae o'n drysu'n hawdd. A dyna fuon ni ddoe yn ei hardd hi, yn rhoi gwledd go iawn i'r gwylanod, yn cynnwys lemon sbwnj, tomatos, cacenni Cappuchino, bara, bisgedi a Scotch Eggs oedd wedi mynd off ers tua wythnos.

Roedd y Scotch Eggs yn boblogaidd iawn ymysg yr adar, mân a mawr, ond gan eu bod nhw wedi mynd off synnwn i ddim petawn ni'n gweld llwyth o wylanod celain ar hyd a lled Tyddyn Canol am sbel. Ydi adar yn fod i futa wyau, dwad? Cawn weld ymhen dim! Www, ecseiting!

Dal i gredu...

Wel, mae 'na un peth da wedi dod allan o'r ffaith bod fy mhen glin wedi penderfynu malu a hynny yw dydw i ddim am weithio dros yr haf. Eto. Er mor ddiflas ydi bod yma drwy'r dydd yn gwneud dim, nis medraf wneud dim i guddio fy nileit. Hihi!

Mi es felly i 'Sbyty Gwynedd ddoe. Roedd y doctor yn edrych fel Christopher Lee ac yn ymddwyn fel Hugh Grant, sy'n gyfuniad od ond yn eitha da hefyd. Wedi cael scan peledr-x unwaith eto dywedodd nad oedd yn poeni'n ormodol am fy mhen glin, ond bod sgen MRI yn bendant yn angenrheidiol. Mae 'na rwbath yn bod 'na, udodd o.

Felly dw i'n cael cerdded o gwmpas heb y splinter, dachi'n gweld. Y broblem ydi bob tro dwi'n gwneud hynna ma'n troi mewn i jeli ac yn gwneud imi gerdded yn od, fel Meic Stevens ar sesh. Ac mae hynny'n boenus, eniwe. Felly peth gorau imi wneud ydi ista flaen y teledu yn gobeithio bod Yr Eidal am guro Cwpan y Byd a bo tim Lloegr i gyd am, wel, torri eu pennau gliniau.

A rwan mae O2 newydd fy ffonio yn gofyn os dwisho 200 tecst am ddim y mis, a minnau wedi gorfod eu troi i lawr, gan ddweud gyda chryn cywilydd tua hynna faint dw i'n gyrru bob blwyddyn eniwe. Damiai.

Bleeeeeeeeeeeeeeeeeeeeeeeeeeeeeeh

Ffaaaaaaaaaaaaaaaaaaaaacin hel! Peidiwch byth a dymuno dim byd, achos mi gewch chi o a newch chi'm licio fi. Fi, myfi a gredais y byddai gwneud dim byd a gwylio teledu drwy'r dydd cyn mynd i gysgu eto yn wych. Asu oni'n rong. Mae diflastod cael pen glin sy 'di smashio'n racs yn annioddefol ar y funud.

Dw i'm yn meddwl bod o weid'i smashio, chwaith. Mi fedrai gerdded yn eitha da rwan, dim ond gwan ydi'r pen glin, ond dw i'n mynd i'r clinic 'fory i wneud yn siwr. Ond mae'n anhygoel faint o ddiflas ydi bywyd ar y funud; yn wir, mae hunanladdiad yn edrych yn opsiwn da, yn enwedig pan dachi'n cael breuddwydion od sy'n cyfuno Saruman a chynghaneddu. Dwi bron a thorri'r pen glin arall er mwyn cael mynd i Ysbyty Gwynedd a chael rhywun i siarad efo drwy'r dydd, hyd yn oed os mai hen ddyn efo iau giami ydio, neu ast flewog o nyrs.

Tydi bod ar y cyfrifiadur fawr o hwyl wedi dyddiau maith. Mae'r rhyngrwyd yn le diflas os dachi ar modem 40kb/s. A rwan dw i'n siarad i Lowri Dwd ar MSN ac yn clywed bod hi isho pw. Ffycin hel, pasiwch y cyanide.

Blas ar Pesda Roc

Do, mi geshi flas o Pesda Roc. O'r ardd gefn. Mi eshi allan wedi gem Yr Eidal a'r UDA (yn flin iawn efo'r Eidal, fy ngwlad Cwpan y Byd) a gwrando. Wel, ar un gân, sef 'Rywbeth Bach Yn Poeni' gan Geraint Jarman nath ddim wneud imi deimlo'n well. Felly i mewn â fi i'r tŷ, yn oer ac yn flin, yn melltithio addasrwydd y gân. A gwylio Big Brother.

Dw i wedi bod yn ei wylio'n selog, a'r unig beth sy'n fy nghadw i fynd ydi sut hoffwn i rhoi cic yn pen Nikki. Ffacin ast. Sut ddiawl y mae pobl yn gweiddi amdani a'i bod yn boblogaidd dw i'm yn gwybod. Mae hi'n crynhoi y math o berson dw i'n eu casau: anniolchgar, dwywynebog, babiaidd ac yn sboilt. Ac yn crio o hyd, ddim yn licio pobl sy'n crio. Ond wir, taswn i'n cael hanner cyfle byddwn i'n rhoi slap i'r gotsan fach.

Pobl anniolchgar ydi'r peth sy'n waethaf gennai, hyd yn oed uwchben pobl trahaus. Ond dw i'n teimlo'n anniolchgar ar y funud; bob tro ma rhywun yn trio gwneud rhywbeth imi dw i'n mynd yn flin ac yn mynnu y medra i wneud o fy hun. Gas gennai cael fy nhrin fel claf. Dad ydi'r gwaetha am hyn, fysa fo'n sychu fy nhrwyn pe fyddai'n cael y cyfle.

A fedra i'm mynd i Pesda Roc heno. Dwisho gweld Bryn Fon, 'chan. Ac oeddwn i isho gweld Geraint Jarman am y tro cynta erioed. Ond nes i ddim, naddo? Dw i'n poeni o hyd na wela i llwyth o bobl eto, fel DI neu Meic Stevens, achos ma'n siwr y byddan nhw'n marw rwbryd yn fuan. A dwisho'u gweld nhw'n perfformio. Damio marwolaeth.

Gwella'n Barod!

Yn barod dw i’n eithaf gwella o’r hen beth ben glin ‘ma. Myfi a fedraf godi fy nghoes yn awr, a rhoi’r modem i mewn, sy’n ddigon i brofi i mi nad ydw i wedi torri dim byd ac mai dim ond briw sydd gennai. Braf byddai hynny, hyd yn oed os oes yn rhaid imi weithio dros yr haf.

Mi drof i’r blog hwn yn le cysegr i fy mhen glin yn awr, a byddwch yn barod i’m clywed yn cwyno am ychydig wythnosau, beth bynnag sy’n digwydd.

Hen fore swreal dw i wedi cael, mewn difri. Daeth Grandad rownd i ddweud helo. Fe gaeth yntau llawdriniaeth ar ei ben glin ychydig yn ôl er mwyn helpu iddo gerdded yn well, ac mae yntau hefyd gyda ffon gerdded. Felly dyma ni’n dau yn y gegin, fel par o hen ddynion (a hanner y par hwnnw yn hen ddyn) yn siarad ac yn llymeitian paneidiau. A chefais i wybod llawer amdano a’i niferus swyddi; cigydd, gyrrwr loriau, gweithio ar y bysus ac yn y blaen. Er, mae’n rhaid imi gyfaddef fy mod i’n teimlo fel fy mod i mewn cartref hen bobl am ychydig oriau.

Ond ia, dw i’n gwella’n barod dw i’n teimlo. Cyn belled nad ydw i’n gwneud dim byd gwirion mi fydda i’n iawn. Sy’n eithaf golygu fy mod i’n ffwcd.

Y Glwyfedig Rachubwr

Ych, mae hyn yn afiach. Adra'n Rachub, efo crytshus a splinter, methu mynd fyny grishau ac am fethu wsos ola'r Gym Gym (erioed i mi!) a Pesda Roc. Ac o bosib allan o acshyn am dair mis. Eshi Ysbyty Gwynedd ddoe wedi y driniaeth warthus a gefais yng Nghaerdydd, a doedd 'Sbyty Gwynedd ddim yn meddwl fawr o agwedd Caerdydd tuag ataf, chwaith. Dw i ar gwrs o Cocodamin neu rwbath, ryw laddwyr poen cryfion sy'n fy ngwneud i'n gysglyd ac yn ddwl. Ond o leiaf mi fedrai wylio Cwpan Y Byd hynny dwisho.

Dw i rwan yn mynd i'r fracture clinic yn YG wythnos nesa'. Os mai fracture ydyw mae 'na beryg y bydda i allan am ddigon fel y bydda i'n methu gwneud hyfforddiant fel athro flwyddyn nesa'. Er mawr syndod imi, dw i'n gytud.

Ond dw i'n gytud bethbynnag. Tra nad ydw i efallai'r person mwyaf annibynol yn y byd, dw i'n sicr yn un o'r rhai yn y byd sy'n gwerthfawrogi ac angen ei ryddid bersonol. Does gen i fawr ohono ar y funud, er dw i rwan yn gallu mynd LAWR grisha, gwneud panad (os dw i'n aros yn y gegin, hynny yw, achos fedra i mo'i chario i'r lownj efo dau grytsh) a chodi heb help. Serch hynny, mae 'na ddigon fedrai'm gwneud hefyd, fel cario pethau, cerdded heb crytshus (o gwbl, lot rhy boenus), gosod y modem a rhedeg i ateb y ffon. Mae hi mor od methu gwneud pethau bach. A sai'n lico. Sai'n lico iot.

Ymddeol o'r Gym Gym

Dw i wedi gwneud ymddeoliad buan o'r Gym Gym wedi i'r Crol Cnau fy ngweld yn groffen y nos yn y 'sbyty. Iawn, dyma'r hanes.

Dw i wrth fy modd efo'r Crol Cnau, a mi wnes i'n eitha da i barhau fel a wnes, yn mynd i bob un dafarn oedd ar agor. Rhwng popeth fe feddwais yn anhygoel, ond dim cyn waethed a'r Dyfedbeth chwyslyd (y greasemonster, chwedl Lowri Dwd), a doedd na'm gwaeth na chael Dyfed yn tagio along drwy'r dydd. Dyma Ceren yn llwyddo wneud lot o bobl grio (wrth ganu, nid oherwydd yr alaw ond oherwydd ei llais erchyll a'i chlogyn od), a gwell gennai'r 'sbyty i hynny.

Eniwe, oeddwn i'n edrych 'mlaen i 'fory i wneud y Mumbles eto a chael 'Steddfod Dafarn nos Iau. Ond na. Trodd Clwb Ifor yn smonach imi. Dyma Mr Coes Dde yn penderfynu datod o'm mlaen i a minnau'n gwingo ar lawr Clwb mewn poen ddirfawr. A phawb yn cicio fi. Fel y gwyddoch, cwynwr o fri wyf i, sy'n golgyu doedd neb yn meddwl fy mod i wedi brifo o gwbl. Felly, ben fy hun bach, i Ysbyty Mynydd Bychan yr es, dal yn gwisgo'r sgert a brynais o'r Scope yn gynharach. Roedd hyn am tua 1 o'r gloch, a ddes i ddim o'r ffycin lle tan 9.30, heb gysgu ers diwrnod cyfan a mwy ac wedi blino gorfod egluro i bobl fy mod i wedi bod yn dawnsio. Wedi torri fy mhen glin dw i, a dw i ar crytshus.

Wedi oriau maith dw i adra, ond yn methu mynd fyny grishau heb boen fawr, felly mae Mam a Dad yn dod i'm hebrwng i'r gogledd drachefn heno. Mae'n gas gennai methu gwneud pethau i mi'n hun a theimlo'n wahanglwyf. Ond dw i owt of acshyn rwan: dim wsos ola Gym Gym, dim Pesda Roc, dim byd. Casau pennau gliniau.

Tri o'r gloch y bore...

Wel, saith, beth bynnag. Achos mai'n saith o'r gloch y bora a dw i'n shatyrd a methu mynd ati i gysgu drachefn. A sal ydwyf ar ddiwrnod gwaetha'r flwyddyn i fod yn sal sef y Crol Cnau, sef tua 15 awr o yfed gwirionaidd.

Sal oeddwn hefyd Ddydd Sadwrn ond mi berswadiais fy hun mynd allan Ddydd Sul i barti'r Tavistock. Y bora hwnnw oni wedi bod yn Albany Road yn siopa am ddillad yn Peacocks. Prynais shorts a thop Mecsico. Nis byddai'r rheiny yn profi parhau'n hir, chwaith, achos fe'm teflid i mewn i bwll yn ardd gefn yn Tavi hwyrach yn y noson. Oni'n gwybod yn syth pan welais y pwll y byddwn i'n un o'r rhai bydda'n dioddef a chael fflich mewn rhyw ben (ond dim cyn rhoi dwrn i Haydn, a bron a theimlo'n euog am y peth). A felly dyma fi'n ddwrbeth yn fy nillad smart newydd, gyda ffôn faluredig, ffôn faluredig Dyfed (dim cyn imi decstio'i fam yn dweud 'sori, dw i'n hoyw'. Yar har!), paced y fygynnod wedi'u datod, leitar oedd ddim yn gweithio a waled gwlypach na dy fam. Ond diolch i Dduw ma'n ffôn i'n gweithio bora 'ma, a mi fedraf ffonio a thecstio fel arfer (dywedaf 'fel arfer' yn yr ystyr eangaf posib. Does neb yn fy ffonio na fy nhecstio. Ffyc, ma bywyd yn drist.)

Dw i'm yn licio'r blydi tywydd 'ma, chwaith. Dw i'n dechrau troi'n goch yn awr, a fedrai'm cysgu'n nos na fedraf? Nac ychwaith symud llawer yn y tywydd hwn. Dw i'n un o'r bobl 'ma sy'n licio mynd mewn i'r cysgod pan mae pawb arall yn mynd o amgylch y lle'n cael tan neis (neu fel Dyfed yn llosgi, shedio'i groen dros y lle a honni mai tan ydyw). Ond dw i'n siwtio fod yn wyn, eniwe, dim yn Arabfrown. Ond dyma fi'n fy ngwely yn 'sgwennu hwn efo breichiau a phen brown a'r gweddill ohonof yn boenus o wyn a phiws. Gennai gymaint o gleisiau ar y funud ma'n anhygoel, rhwng disgyn mewn pyllau a cael fy nhrywanu gan Kinch.

Eniwe, bydd rhaid imi ddechrau yfad mewn pedair awr a 'sgennai'm drw dydd i 'sgwennu blog. Nacoes, wir.

Tenis Poeth Hyngowfyr

Pan oeddwn i'n ieuengach oeddwn i'n wych ar tenis, oeddwn i'n cael gwersi yng Nghaernarfon bob wythnos ac ati. Erbyn hyn prin fy mod i'n cael y cyfle, a dweud y gwir. Ond mi ges ddoe. Aeth Ellen a fi i chwarae yn Nhalybont. Y tro ddiwethaf inni chwarae fe gurais innau'n reit hawdd, ac o'n ni'n benderfynol i wneud yr un peth eto. A mi wnes 6-2 6-1 (sori, Ellen, ond mae'n rhaid dweud wrth y byd y cefaist ti, sy'n mynd i nofio ac yn bwyta'n iach, dy guro gan foi tew o gylch Bethesda).

Nos Fercher fuon ni allan i bobmathia o lefydd. Dw i'm yn cofio wedi tua 11, gwyddwn hyn yn iawn, ond aparyntli gesi'n gwrthod i mewn i'r Taf oherwydd fod 'fy llygaid i'n edrych yn od'. Ond y pwynt yw fod gennai ddiawl o ben mawr diwrnod wedyn, a ni ddewisiwyd 3 o'r gloch y p'nawn fel adeg gorau neu cwliaf y dydd i chwarae tenis. O ystyried fy mod i'n hynod, hynod ddiog ac angen colli pwysau mae gennai ddygnwch dda, a phenderfyniad tarw wyllt.

Penderfyniad yn unig a wnaeth imi actiwli fynd allan nos Fercher. Waw. Gorffen yr arholiad olaf erioed. Dydi o dal ddim yn teimlo fel fy mod i wedi! Ond Iesu, mai'n deimlad da! A rwan fe ga'i fod yn hollol rhydd nes dechrau gweithio mewn tua pythefnos. O ystyried faint o hawdd dw i'n meddwi ar y funud, nid peth da mo hynny yn y lleiaf.

Y Dychweliad

Od iawn fy mod i wedi bod hanner wythnos heb flogio. A dweud y gwir ichi, ers nos Iau dw i wedi bod yn teimlo'n sal, ond wedi parhau ati i yfed. Ond nos Sadwrn, wedi noson randym iawn o fynd i Landaf i lle o'r enw y Butchers, i lawr i'r Mochyn Du ar y piano mi ddychwelais ar nos Sadwrn i Glwb Ifor Bach wedi misoedd lawer o alltudiaeth.

Mae'r lle 'di newid rhywfaint ers imi fynd 'na, dw i'n eitha sicr. Ond fel nos Iau mi wnes i eitha colli fy hunan-reolaeth, ers nis chwydais doeddwn i'm mewn rheolaeth o fi fy hun. Fel y gwyddoch dw i yn hoffi meddwi, ond er fy meddwod mae gen i o hyd reolaeth dros be dw i'n neud, dim ots faint o chwil dw i neu faint dw i wedi yfed. Dw i ddim yn hoff o beidio bod mewn rheolaeth o fy hun, dydi o'm yn deimlad neis. Ond roedd Clwb yn eitha gwag felly sylwodd neb, amwni. Diweddais yn mynd i Troy kebab am kebab. Doeddwn i ddim isho fo o gwbl ond mor benderfynol yr oeddwn o'i chael mi ymrwymais iddo a'i stwffio i gyd i mewn. I 'ngheg.

Dydd Sul sal iawn oeddwn, mewn difri calon. Eshi i lle'r genod ac i'r Bae yr aethon ni am ginio (sef Mr Haydn Blin, Mr Rhys Iorwerth, yr enwog G.B.E. a bwli'r ganrif, Ellen Angharad Jones). A wedyn fe flinon ni a mynd adra. Beth bynnag, oedd gennai craving enfawr am gorgimwch a mi eshi i Tesco Express a phrynu lot o salad.

Yn bersonol dw i'n meddwl bod salad yn lwyth o gach ond mi brynais i salad corgimwch, salad Roegaidd a salad datws. Neis ydoedd y ddau, a'r mae'r tatwsaidd dal yn yr oergell yn disgwyl cael ei sglaffio gennyf amser cinio heddiw. Ond mai rhywsut yn dywydd salad, tydi? Felly i'r oergell yr af. Ta ra!