Mae’r darnau yn disgyn i’w lle yn araf bach. Nid yn unig ydw i wedi dechrau meddu ar y gallu i anwybyddu’r polau piniwn, dwi’n cael y car nôl heddiw (mi gostiff), mae’r cefn yn gwella’n dow dow diolch i ambell beth a dwi fy hun yn teimlo’n well. Does ‘na ddim llawer o bethau yn digalonni rhywun na bod mewn poen 24/7, dydi o jyst ddim yn hwyl, dyna’r gwir amdani.
Braf fyddai peint heno ‘ma yn yr haul poeth, ond gan gael y car nôl rhaid siopa bwyd er mwyn i mi bara ychydig ddiwrnodau’n ychwanegol cyn ehedeg i’r Gogledd. Bydda i yn y gogledd y rhan fwyaf o wythnos nesa’, gan ddiogi’n bennaf, ond hefyd ceisio cael argraffiadau o sut y mae pethau’n mynd yn y ras etholiadol.
Rhaid i mi gyfaddef, o ddarllen Proffwydo 2010, na wn sut y mae ambell sedd am fynd, a bod llawer o’r dadansoddiadau yn ddigon redundant erbyn hyn (mae bron yn teimlo fel wast o 50,000 a mwy o eiriau!). Y straeon yw bod y Democratiaid Rhyddfrydol yn eithaf hyderus yng Ngorllewin Abertawe, bod Plaid Cymru am symud adnoddau o Aberconwy i Geredigion, y gallai Arfon fod yn agos iawn os ydi Bangor yn penderfynu pleidleisio, ac y gallai Lembit gael sioc ar y diawl. Mae rhai yn darogan trydydd iddo fo – wn i ddim awn i mor bell â hynny!
Ac mae’r syrj yn cyflwyno heriau enfawr i Lafur – ym Mhen-y-bont, y ddwy sedd yng Nghaerdydd sydd ganddi a seddau Clwyd. Yr wythnos hon, wrth ystyried y posibiliadau’n llawn, be di’r gair dŵad, dwi’n stumped. Hollol, hollol stumped.
Un peth a ddywedaf ydi hyn: dwi’n meddwl y bydd lot o bobl sy’n dweud eu bod am fwrw pleidlais i’r Lib Dems naill ai a) ddim yn boddran pleidleisio, neu b) yn newid eu meddwl yn y blwch pleidleisio. Faint o effaith gaiff hynny, wn i ddim.
Pe gofynnid i mi rŵan beth fydd yn digwydd, swni’n rhoi 5 i Blaid Cymru, 4 i’r Democratiaid Rhyddfrydol, 11 i’r Ceidwadwyr, 17 i Lafur, ac 1 i Lais y Bobl sy’n gadael dau. Fedra i ddim ar hyn o bryd alw Ceredigion: chi ar lawr gwlad yno ŵyr yn llawer gwell na fi. Y llall ydi Maldwyn, mae ‘na straeon od iawn yn dod o’r fan honno!
Ta waeth, erbyn dydd Iau nesaf mi fydda i yn galw pob un – gobeithio bydd y blogsffêr Cymraeg hefyd yn barod i wneud erbyn hynny!
4 commenti:
Fedra i ddim siarad am llawer o Gymru wrth gwrs, ond 'does yna ddim lle ar hyn o bryd i feddwl bod Arfon mewn perygl o safbwynt y Blaid, a cheisio symud adnoddai i Aberconwy mae'r Blaid os rhywbeth.
Dwi ddim am ail-ddechrau blogio, ond mi roi £10 ar Albert yn ennill Ynys Môn efo mwyafrif mwy...
Dwi di haeru ers tro bod Lembit O'Prick mewn perig ym Maldwyn. Mae pawb wedi cael llond bol ohono. Wnaeth y fordaith, y treuliau ac yn anad dim, ei fywyd personol erchyll, amharu ar ei siawns o ddal ei afael ar y sedd. Gwelir e fel ffwl gwirion, heb unrhyw deyrngarwch i'r etholaeth. A bod yn onest, Heledd Fychan, sydd wedi bod yn drawiadol yma, a hi yw'r unig berson sydd wedi bod yn eofn a gofyn cwestiynau anodd iddo. Mae Glyn Davies wedi bod yn lwcus iawn, oherwydd Heledd sydd wedi bod yn gwneud yr ymosodiadau i gyd, a GD fydd yn elwa. Gellid cael moment Portillo ym Maldwyn. Bydd llawer o bleidleisio tactegol er mwyn cael gwared ar O'Prick. A dynan'n union be dwi'n bwriadu gwneud!
O ble daw'r sibrydion parthed Maldwyn? Unrhyw oleuni??
Posta un commento