I'r De

Wel, gyfeillion, wedi wythnos yn y Gogledd mae'n bryd imi ddychwelyd i Gaerdydd mawr drwg, er fy mod wedi wirioneddol mwynhau fy mhrofiad gyntaf o ddysgu yma yn y twndra. Ond myfi a fwynhaf mynd i Glwb Ifor heno, gyda phawb yn ôl yno; er fod y Llew a Ceren wedi cael ban, a Haydn mwy na thebyg wedi ar ôl iddo geisio taro un o'r bownsars y mwng wirion iddo fo. Iawn, mi ga' i gic-owt erbyn diwedd y nos, ond dim nes imi ddawnsio'n wirion a dwyn diodydd pobl eraill.

Wythnos nesaf dw i'n cael fy mharashiwtio mewn i ysgol uwchradd (ond cha i ddim dweud lle, wrth reswm. Fe gewch chi wybod rhywbryd, pan welwch chi fi yn chwil, a mi anghofia i fy mod wedi dweud wrthoch chi cyn dweud wrthoch chi unwaith eto pan fy mod yn chwil er fy mod wedi dweud wrthoch chi o'r blaen pan yn chwil ac felly'r parheid y cylch). Ac erbyn hyn dw i'n edrych ymlaen yn arw. Y ffordd wela' i hi ydi os nad ydw i ofn pobl, be ddiawl sy 'na ofni gan blant?

Nainddyfyniadau

F'annwyl Nain, seren fy nos a haul fy niwrnod! Mi esi gweld Nain wedi ysgol heddiw. Does gwell na'i gweld hi'n contio fy nhaid druan.

Mae o'n symud. 'Lle mae hwn yn mynd eto?' ebe hi.

N: What's wrong, can't you walk? You been sleeping all day?
T: No I ain't. I been on the bike doing my exercizes.
N: Well you're walking like you been sleeping. You should be all surple.
T: Surple? Ha!
N: Yes you should.
T: Well I don't know what surple means, I think you mean 'supple'.
N: Oh sorry, Mr Correct.

Oes gwaeth sarhad na hynny? Oes, os mae Nain o gwmpas.

N: Hogyn del ei Nain ydi o!
Fi: Ia, Nain.
N: Wel, mae'n rhaid i rywun ddweud bo ti'n ddel, does.

Yr Atrocious Ocean

Wel o leia' do'n i'm yn goro gwisgo tei heddiw. A dw i 'di penderfynu mai athro ydi'r swydd imi. Achos fedrwch chi ddim bod yn gysgwr proffesiynol. Fe allwch gysgu o gwmpas yn broffesiynol, ond nid Abi Titmuss mohonof (na Haydn) felly gwnaf i ddim mo hynny. Wel. Efallai rhywbryd. Mae puteindra yn well na dim, wedi'r cyfan. A dw i'n siŵr y blinaf i ar addysgu rhyw bryd.

Nad ymboenwch, nid oes gen i ddiddordeb yn adrodd hanes fy niwrnod ichi. Wel, efallai. Roedd un o’r plant ddoe yn credu mai enw’r ‘Atlantic Ocean’ yw’r ‘Atrocious Ocean’, ac fe fu un yn sôn am y stabings ym Methesda i’w gyfeillion o dramor pan wnaed fideos ar eu cyfer.

Wedyn mae rhywun yn clywed bod hanner dda o’r plant yn dod o gartrefi di-Gymraeg (neu sy’n Gymraeg ond ddim yn pasio’r Gymraeg ymlaen i’w plant, sydd jyst yn typical, tydi?). Ac mi sbwyliodd hwnnw ychydig ar fy hwyliau, dw i’n fodlon cyfaddef, er bod y Gymraeg yn gryf yn yr ysgol.

Beth bynnag, isio son amdanaf fi fy hun ydw i, nid pethau mwy, a phwysicaf (os ydyw’r math beth yn bodoli yn yr hwn fyd). Wythnos i heddiw fe fydda i yn yr ysgol uwchradd. Mae hynny’n eitha’ dychryn rhywun, a dywedyd y gwir yn onest. Dychrynais unwaith hefyd yn meddwl bod ci wrth fy ymyl ond fy mharker ydoedd, er mai stori wahanol ydi honno nas chaiff mo’i hadrodd fyth yma.

Ac os ma’r plant yn fy nghosi eto mi roia i slap iddyn nhw. Y moch bach. Ciwt.

Ymfeddalaf..

Meddalu

Dw i'm yn meindio cyfaddef nad oes gen i fawr o ddim i'w ymfalchio ynddo fo. Un o'r pethau, fodd bynnag, yr wyf yn ymfalchio ynddo'n ddi-ymddiheuriad yw'r ffaith fy mod i'n hen beth ystyfnig, bengaled ac oeraidd ei galon ar y cyfan. Mae gen i galon o garreg dan yr hwn arwyneb boliog gnawdiol, a fel phob rhyw berson felly dw i'n ymfalchio ynddo.

Felly faint o sgytwad ges i heddiw wrth ddarganfod fy mod i'n eitha hoff o weithio gyda plant? Fel y dywedais, fedra i ddim enwi ysgolion, ond dw i mewn ysgol gynradd am wythnos a heddiw fe fu imi mwynhau caredigrwydd y plant yn ofnadwy, a'r ffaith eu bod nhw isio siarad, amdanynt hwy eu hunain ac amdanaf fi wrthyf. Rydym ni'n son am blant sy'n llai na phump yma, a gwr bonheddig (myfi, canys pendefig ydwyf fy naws, nis gallaf mo'i gwadu) sydd wedi ers ei fywyd fel oedolyn pregethu'i gasineb a'i ddirmyg tuag at blant, a'r ffaith y sbadded ef ei hun cyn eu cael.

Ond mwynheais heddiw. A fyddech chwi nad ydych yn f'adnabod ddim yn llawn dallt yr ysgytwad a gefais wrth fwynhau. Byddai pawb sy'n f'adnabod yn dallt, ond ddim cweit yn dallt pam fy mod yn ei chyfaddef o flaen pawb. Dw inna'm chwaith.

Ymhle yr atelir? Cwningod yn anifeiliaid anwes a chandi fflos i frecwast? Treulio f'amser yn gwylio My Little Pony a phrynu llyfrau lliwio mewn? Boed i Dduw maddau imi am heddiw gwahanoleiddio fy hun o'r ffordd ag Efe a'm gwnaed. Dw i'm am droi'n sofft. Mi a'i allan heno a sgwashio bwni, jyst er mwyn profi fy hun yn iawn.

Y 50 nesaf o pethau sy'n eich cythryddu...

Mae’r penwythnos gyntaf nôl wedi rhoi cyfle imi adlewyrchu drachefn ar fywyd. Neu, yn hytrach, y pethau drwg am fywyd. Pwynt bywyd ydi eich cythryddu cyn eich gyrru i’r uffern. Felly, a fi yn fy olaf aflonyddiadau (mwy na thebyg – does gen i fawr o hyder am hyd fy oes), dyma mwy fyth o bethau i’ch corddi cyn eich diwedd prudd. Ac er mwyn profi i Delyth nad diog mohonof:

51) Pan fyddwch yn mynd i bysgota a dachi’n rhedeg allan o linell
52) Y bastads ar Queen’s Street sydd eisiau siarad efo chi am elusennau neu ‘pa sudd afal ydych chi’n yfed’
53) Pobl sy’n gofyn ‘be ti ‘di ddal’ pan ti’n pysgota
54) Cwestiynau amlwg eu hateb
55) Pobl sy’n mynnu dy fod yn edrych yn drist/blin pan nad wyt o gwbl
56) Pryfaid bychain
57) Trwyn Gwyneth Glyn
58) ‘Ti mond yn gweld tylwyth teg os ti’n coelio ynddyn nhw’. Pam?
59) Y ffaith bod y mwyafrif o’r Cymry ddigon stiwpid i bleidleisio dros Lafur

60) Marwolaeth ar amser anaddas – fel hers o dy flaen pan ti efo can milltir arall i gyrraedd nes Caerdydd
61) Munchkins
62) Celebrity Love Island
63) Llysieuwyr
64) Unrhyw un sy’n mynnu fod gan goed deimladau
65) Babanod
66) Genod 14 sydd isio babi
67) Pobl sy’n cynllunio pethau i’r manylyn olaf
68) Smartcars
69) Pobl sy’n giglo pob tro mae rhywun yn dweud ‘69’. Fel fi. Hihihi!

70) Pobl sy’n rhoi enwau gwirion i’w plant, fel ‘Peaches’, ‘Apple’ neu ‘Gruffudd ab yr Ynad Coch’
71) Fersiwn McFly o ‘Don’t Stop Me Now’
72) Trendy Bars
73) Pobl sy’n dweud bod acen y gogledd yn swnio’n ‘thic’. Gennai newyddion ichi; dachi’n swnio’n waeth.
74) S4C yn portreadu pawb o’r gogledd fel pobl ddigalon, alcoholic, a phawb o Gaerdydd fel ‘cŵl’.
75) Rhoi pethau’n ôl yn yr oergell heb ffoil na clingfilm arno
76) Gweithwyr bar sy’n edrych yn hurt arnat pan ti’n dweud ‘peint o Carling’ yn lle ‘pint of Carling’. Plîs.
77) Pobl sy’n mynd ‘Waw! Ti mor Gymraeg!’
78) ‘Dwi’m yn gwrando ar nhw achos mae nhw’n boblogaidd’
79) Goths. Yn enwedig y rhai sy’n meddwl eu bod nhw’n ‘unigryw’.

80) Hipis.
81) Pobl sy’n gofyn wrthot ti’n stryd os cawn nhw 10c er mwyn prynu panad
82) Gweithwyr bar/siop sych
83) Rhieni sy’n bwydo eu plant gyda têc-awê bob nos
84) Scientology
85) Unrhyw un sy’n fy annog i i fyw fy mywyd i’r eithaf. Dw i’m isio.
86) Llefrith soya
87) Pobl sydd byth yn trio bwyd newydd
88) Powys
89) Pobl sy’n mynnu bod galw rhywun du/Pakistani a.y.b. yn ddu/Pakistani yn hiliol

90) Acen Lerpwl
91) Pam dachi ar fin cwblhau rhywbeth, ac mae pethau’n mynd yn anghywir, a ti’n teimlo dy fod yn gorfod dechrau eto
92) Mab Dr Mark Sloan
93) Ynganu ‘ei’ fel ‘ai’ yn y Gymraeg
94) Gwefusau tragwyddol llaith rhai pobl
95) Pan fo past dannedd ar fy wefus a does neb yn dweud wrthot ti tan amser cinio
96) Siopau Bwyd Iach
97) Pobl gwyn sydd efo gwallt fel rasta
98) Pobl heb farn
99) Gorfod smalio eich bod hi’n hapus dros rywun, tra eich bod yn nwfn eich calon wedi gobeithio am eu chwalfa

100) Cael sialens, fel, dywed, ysgrifennu 50 mwy o bethau sy’n eich cythryddu, neu cael ei lablo fel ‘diog’, a methu anwybyddu hynny, a gorfod ei gwneud.

Dechrau go iawn go iawn

Bydda i'n mynd i ysgol fach am wythnos wsos nesa'. Gwell imi beidio dweud pa un. Na pha ysgol uwchradd y bydda i'n mynd i; Duw a wyr pwy sy'n darllen y rybish yma, ond efallai eu bod nhw eisiau dymchwel fy myd drwy gwybod popeth amdanaf sy'n eitha hawdd gwneud gan fy mod i'n dweud cyn gymaint o bethau ar yr hwn flog. Anadl.

Dw i'm am eich cadw chi. Yn Rachub ydwyf drachefn, wedi gyrru fyny heddiw ac yfed lot o ddwr canys fy mod allan neithiwr a chanfod fy hun mewn gaybar efo Nerys Crymych. Sy'n eitha od, tydi?

Bore da

Dw i'n dechrau mwynhau'r cwrs, ond fel a allwch weld 'sgen i dal ddim rhyngrwyd yn y ty. Dim ots. Dw i'n gwneud wythnos yn yr ysgol fach wythnos nesa ac erbyn fyddai'n ol fydd gynnon ni hwnnw'n ty. Fedrai'm sgwennu mwy achos mae gen i ddarlith plys mae'r botwm DELETE wedi torri ar y cyfrifiadur yma jyst er mwyn pisio fi off. Casau 9.08AM

UWIC

Helo 'na! Shwmae! Ie, fi Dai sy 'ma. Oni bai na Hogyn o Rachub dw i, a dw i'm yn gofyn sut ydach chi achos dwimisho. Newydd gyrraedd UWIC a darganfod bod y cwrs yn edrych yn erchyll. Ac mi oedd miwsig Clwb Ifor nos Sadwrn yn erchyll. Ac mae'r pryfaid yn ein ty ni yn Newport Road yn erchyll, a hynny oherwydd nad oedd Haydn nac Ellen wedi rhoi'r biniau allan am fisoedd. A dw i'n teimlo'n erchyll yn gorfod codi bob bore am wyth a mynd i Cyncoed. Ga'i sioc flwyddyn yma, wchi.

Dw i'n dechrau mewn ysgol mewn llai na phedair wythnos. Mae hynny'n fy nychryn. Ond ma'n beth da gweld fod pawb arall wedi cael cymaint o sioc a mi.

Fedrai'm aros. Mae'r clicio parhaol yn ystafell gyfrifiaduron UWIC yn mynd ar fy mhen. Dw i wedi blino. Dw isho bod yn fyfyriwr drachefn.